اللهم اجعل القرآن لنا هدى ونوراً ورحمة، ولا تجعله علينا وبالاً وحُجَّة ونقمة.

الأحد، 8 ديسمبر، 2013

2/11/2013


نحجز انى يوم
قاعه
فستان ((ابيض ))
كوافير 
استوديو
تنجيد
فرش شقه
حنه
.......
بوكيه ورد
زفه
كتب كتاب
مأذون 
امضى هنا
وابصمى هنا
فكرى يمكن تغيرى رائيك
زغاريط
ونقل دبله من ايد لايد
رقص سلو 
راميه بوكيه
هاتى ايدك يالا عشان هنروح على بتنا
بتنا يعنى بيتى انا


يعنى انـــــــــــا
اتجوزت

بقيت مسؤوله عن بيت وانسان انا بش بحبه بس بعشقوا
بس 

انا بقى اسمى مرات احمد
اوعى تقولى مدام 

وفتكم بالعافيه  

الأحد، 26 مايو، 2013

ممكن ......

ممكن الواحد ينسى اى حاجه عدت عليه
وممكن برضو الواحد يحب اى حد حتى لو ملهوش علاقه بيهم لمجرد انهم شركا فى شىء واحد
وممكن الواحد يتنازل عن انوا يسعد نفسه عشان فى ناس تانيه بقت مهمته فى الحياه انها تسعدك
ووممكن كمان الواحد ينسى يزعل ينسى يتقمص ينسى يتعصب ينسى اى حاجه وحشه عشان مبقاش فى حياتك حاجات من الحاجات اللى تخليك كده
وممكن كمان الواحد على فكره ينسى نفسه عشان مبقاش مع نفسه بقى مع نفس تانيه 
ممكن كمان الواحد ده يتغير يتغير بش شخصيتوا بس
يتغير فى حاجات ده تانيه كان عمال يدعى انها متبقاش فيه ومهما كان يدعى مكنش فى حاجه بتتغير عشان هو مكنش عايز يتغير يمكن او يمكن عشان مكنش فى حاجه تغيروا بس دلوقتى بقى فى 
دلوقتى لمجرد مايبص على الدبله يعرف ان فى حاجه حلوه لازم يتغير عشانها
ممكن الواحد يندم طول حياتوا لمجرد الندم وينسى بس الندم فى الوقت اللى بيبقى فعلا نفسوا يرجع تانى يتولد من جديد عشان نفسه يبقى مخلوق جديد عشان انسان شافوا بعد حاجات كتيرررررر بقت فى حياته وبقت مأثره فيه بيبقى ساعتها الندم جامد اووى وبيبقى حاسس بيه اوى

انا معرفش انا ليه رجعت اكتب بس كل الحكايه
ان انا الواحد ده اللى ممكن يعمل اى حاجه عشان يبقى قادر يسعد الانسان اللى ربنا بعتهولى من غير مااعرف ايه الحاجه الكبيره اووى دى ولا الحلوه اللى انا عملتها فى حياتى كلها عشان ربنا يبعتلى عشانها الانسان ده 
او يمكن ربنا بعتهولى عشان اتعلم من اول وجديد اتعلم حاجات انا مكنتش اعرفها مكنتش واخده بالى منها 

انا كل ماابص على دبلتى بحمد ربنا ان انا طلع قدرى عند ربنا حلو اووى كده 

بحبك يااحمد والله وانت تستاهل اقعد افكر بسنين عمرى كلها ازاى اعرف اخليك اسعد انسان فى الدنيا دى كلها 

ربنا يخليك ليا 

الجمعة، 12 أكتوبر، 2012

يادبله الخطوبه ولبستك خلاص :D


 31 - 8 - 2012 

اليوم العالمى 
يوم خطوبتى :D 
ازيكم وحشتونى جدااااااااااااااااااااااااااااااااااااااااااااااااااااااا
حتى المدونه وحشتنى اووى وشكلها اتغير معرفش هيااتغيرت من امتى 
بس يالا ماهو محدش بيفضل على حالوا 
اينعم انا حاسه ان انا بش عارفه اتعامل مع الشكل الجديد ده بس على مين انا ريرى ماحط حاجه فى دماغى هعدلها

المهم ايه !!
اه ايه انا بقيت من الناس المخطوبين  واخد لقب المخطوبين والحمد لله اه بش زى ماضحكوا عليا وادونى لقب عاطله وفضل مرزوع معايا كتيررررررر  :D 
وبقى عندى حبيبى ومحدش احسن من حد اه ونعمه ههههههههههه

بعيدا عن الهبل اللى بقولوا ده 
انا فعلا مبسوطه بس بش عشان بقيت من الناس المخطوبين لاء عشان الحياه دى نفسها اه كنت بتمناها زى زى اى حد بس كانت غريبه عليا شويه كنت مفكره ان بش انا بش ليا يعنى وعلى رأى المثل 
(( عينى فيه كخا عليه ))
انا مبسوطه عشان لقيت انسان غير معانى كتيررررررررررررررررررررررررر كانت فى دماغى دى 
ودماغى دى اصلها دماغ صعيدى صعيدى يعنى 
بدءت احس ان فى حد لى حق عليا ان اشركوا فى حياتى مبقتش انا لوحدى ومع نفسى كده اطق اطق لوحدى اتفرس اتفرس لوحدى كده لاءءءءءءء بقينا سوا 
بقينا انا واحمد
هو احمد
اللى بجد بقى كل حياتى
وانا فى قويه العقليه بقول وبعترف 
انا بحـــــــــــــــــــــــــــــــــــــــــــــــــــــــــــــــــــــــــــــــــــــــــــبك يااحمد

حبه هزرايه بقى 
يااحمد بش كل يوم يااحمد تتضرب تليفون يااحمد يامغدينى وماعشينى بسكويت يااحمد يامعودنى على الاتيكيت ياااااحمد 
لولولولولولىىىىى

فى رغى كتيررررررررررر اوى عايزه ارغى فيه بس فى حاجه لحظتها 
ان المدونه ياجدعان مكنتش مهجوره اه ونعمه كان فى ناس بتتدخل 
وعشان كده انا هرجع تانى وقاعده على قلبكم وهقعد ارغى زى زمان واصدعكم اومال اصدع الراجل الغلبان ده 
هرغى بس بش من اول ماارجع كده للناس تتطفش مع انى عارفه ان مفيش حد هيطفش :p 


واييييييييييييييييه 
ايوه فتكم بالعافيه

الأربعاء، 20 يونيو، 2012

مكنتش اعرف ان فى حد حلو اوووى كده
ولا كنت اعرف ان الحب بيبقى بشكل ده
ولا كنت فاهمه ان اللى عدى ده كله ولا حاجه فى يوم مع حد انت بتحبه وهو بيحبك بشكل ده
ولا كنت اعرف ان هيجى يوم والدنيا تتضحك ليا
ومكنتش اعرف ان انا ممكن استغنى عن حاجات كتيررررررر عشان خاطر انسان
طول عمرى فرحتى كانت متعلقه باللى حواليا
اول مره احس بطعم فرحتى انا
انا اه بحبه وبحبه بجد بش هزار ولا كلام ولا اعجاب
ده هو ده الحب اللى كنت بحلم بيه وبدور عليه
يارب يهديك ليا وتفضل معايا وبش يحرمنى منك
وافضل عمرى جامبك وانا مطمنه بيك

______

فى مواقف بتحصل بتعرفك اللى قدامك اد ايه
هو شيلك فى قلبه سوء حب وفرحه بيك او كره وغيظ منك
وانا بش زعلانه من اى حد كنت مفكره نفسى هيفرح عشانى
انا لو كنت زعلانه فانا زعلانه منى انا عشان المفروض بش اتوقع حاجه من حد

_________

انا بجد مبقتش عايزه اى حاجه
ولا طالبه اى حاجه
ولا بتمنى اى شىء
غير حاجه واحده بس
ومبقاش اى حد يهمنى
غير شخص واحد

______________

حادى بادى كرمب زبادى
شلوا حطوا كلوا على ادى
ده شفيق وده مرسى
!!!


فتكم بالعافيه

الأحد، 10 يونيو، 2012

8-6-2012


فاكرين لما قولت فى يوم من الايام هقول اسم البوست باسم المدونه
حلم ريرى
اهو هو بدء حلم ريرى يتحقق
يمكن كنت بقول زمان ان فى هديه ربنا شيلهلى انا متاكده من كده
معرفش ايه نوع الهديه دى بس كنت متاكده ان فى حاجه حلوه ليا عند ربنا
يمكن ميكنش جاى من حب ولا هقول صالونات
عشان اول ماشوفتوا حسيت ان اعرفوا من زمان
ولاقيت نفسى بقول من جوايا هو ده
من غير مااعرفوا
بعد ماعرفتوا
اتاكد ان هيا دى الهديه بتاعت ربنا ليا
انا بشكرك اووى ياربنا على الهديه دى
وبشكرك يااحمد عشان خلتنى اعرف ان فى حاجات كتير ربنا مخبيها لينا فى وقتها بتظهر

يوم
8-6-2012

انا اتقرا فاتحتى
والخطوبه باذن الله بعد رمضان
على احن واطيب انسان انا عرفتوا
احمد


هو فى كده زى قلبك لسه فى الدنيا خير
عمرى ماانسى قبلك كنت فى ايه ومعاك بقيت انا ايه
انا باقى ليك ولحد ماعمرى ينتهى هفضل ياحبيببى معاك وهعيش وهموت بهواك
انا ليا مين غيرك حبيب عمرى
يامن عشت اتمنى قبلك يالى بش زيك كتير
بش مجامله عشان بحبك ده انت ليا حاجات كتير
وهى كام مره هقابل حد بيحب بضمير
حد عاش عمروا عشانى وقلبه ليا بين ايده
................

^_*

الثلاثاء، 29 مايو، 2012

شالوا ألدو جابوا شاهين ألدوا قال ماحناش لاعبين


الاول بس قبل مااندمج فى الكتابه
انا عرفت ازغرط اه والله
^_^

وبعدين بقى انا دهانه الكلام بالاسود مع انى الاسود لون الشياكه
الا ان هو بيدول على الكأبه والحزن
واحنا مفيش احسن من الايام دى عشان الواحد نكتئب ونحزن
فدعونا نكتئب حبه :(
^-^

عجبكم كده اهو بقينا
نقول زى الامثال
شالوا
ألدو جابوا شاهين ألدوا قال ماحناش لاعبين
و
أسخم من سيدى الا ستى
وهلم مجررررا من الامثال اللى تتقال فى الموقف المنيل اللى احنا بقينا فيه
^-^

انا بجد بعتب وجامد جداااااااااااا
على الناس اللى بش نزلت الانتخابات
ليه ياحج وليه ياحجه
فى ناس غصب عنها معرفتش تروح يمكن دول ليهم اعزار
لكن بقى الناس اللى كانت قاصده دول ملهمش اى عزر
قولتوا هتقطعوا الانتخابات عشان وعشان وكلام سياسه والذى منه
ادى الانتخابات اتعملت
مفكرتش او مفكرتيش
دلوقتى وفى لحظه ماهو بيعنلوا النتيجه وهما بيقولوا الاسامى اللى دخلت الاعاده
انك كان ممكن صوتك يفرق
ونلاقى اسامى تانيه فى الاعاده غير دول
اقول ايه ...؟؟!!
بجد بش عارفه اقول ايه
غير ان فى ناس بتركب دماغها فى حاجات مينفعش نركب دماغنا فيها
عايزين تقطعوا اهى المقاطعه جايا جايا برضنا او بالغصب
انا حلفت ماهنزل واتعب نفسى تانى فى اعاده
وفى ناس وصلتنا للاعاده دى وهما قاعدين بش هقول مريحين دماغهم لاء ده عند والعناد ده جاه على دماغنا احنا
يمكن كان هيبقى فى امل
بس عما اعتقد مبقاش فى حاجه خالص
وعلى رأى فؤاد المهندس
الله يرحم الجيل ده
:(

^-^

فى ناس بتحاول تستفز الواحد ويقولك يعنى انت بش عحبك الاسلامين
مين قال كده
ماحنا مسلمين ياعم الحج بش كفاره
يقولك طيب مادول هيتعملوا بالاسلام
على عينى وعلى راسى مع انى ماحنا بنتعامل بالاسلام
بس مين دول
اللى عايز يطبق حاجه هو بش بيعملها
بش اولى ان اطبقها واتعامل بيها الاول وبعدين اقول كده للناس
وابسط مثال
هو الاسلام فيه برضو؟؟؟
ان اروح اشترى انسان غلبان وعشان بش لاقى الاكل عشان اخد صوته
ده فى شرع ايه ده
نسميها ايه دى
ردوا !!!
بتاكل غلبان يبقى عشان صدقه او زكاه بش عشان اشتريه
انا اكتر حاجه بتستفزنى بجد ان اى حد فاى حد بقى يعمل اي حاجه ويقولك الدين
مالك انت ومال الدين اذا كان انت بش مطبقوا عليك
ارحمونا بقى
والدين بين الرب والعباد
تتدخلوا انتوا ليييييييييييييييييييييييييييييييييييييييه
ايه الصفه بتاعتكم
واقرب مثال
لما كنا ايام انتخابات مجلس الشعب
مواقفين رجاله طول بعرض يقولك ايه وانت مشى رايح تنتخب
عشان تكمل دينك انتخب فلان ولا حزب فلان
ايكش تشك فى بطنك يابعيد
بصراحه انا مستفزه وبش منهم لاء بس من اسلوب الحوار اللى بيحاولوا يخلوك تحس انك لو معملتش زى ماهما عايزين
ليك النار من اوسع ابوابه
^_^

وناس بقى تنتاقش معهم
يقولك شوفت انت المطار لو بش شوفتوا اسكت خالص لو سمحت
بس انا شوفت المطار اتكلم بقى
جميل وحليوه وبيدور على عروسه
^_^

اى كان بقى اهو زيوا زى غيروا
مافيش اى جديد
الصوره بش عايزه تتركب على بعضها
وفى تصريح كان لواحد من المرشحين
بيقول
انتوا ليه بتعملونى كأنى ابن البطه السوده؟
صحيح ان الشعب دلوقتى ابن البطه البيضه اللى الاتنين بيتسبقوا عليه
بس بعد كام يوم
هنبقى كلنا ولاد البطه السوده
اه
هنبقى ولاد البطه السوده بش انت بس
يالا هيص بش لوحدك :)
^-^

انا اكتر حاجه مزعلنى سيبك من مصر واللى حاصل فيها
عشان ده بش جديد عليها يعنى
انهم خلوا الشعب كلوا بقى مندمج فى السياسه ومشغول اووى ايه اللى هيحصل كل دقيقه
قعدونا على اعصابنا فكل يوم كان بيعدى من ساعت مالدنيا ماقامت
وانا واحده من الناس دول
مكنش لى اى علاقه بالاخبار ولا كنت بحب اسمعها وكنت بتخانق مع اى حد عندنا جايب قناه عليها اخبار
لان بجد مكنش هاممنى اى حاجه اللى يحصل يحصل
كده كده الدنيا بايظه
كده كده بتخرج على الشارع بتلاقى الزباله اكتر من الناس فى الشوارع
كده كده الواحد بيطلع عينه فى دراسه وكورسات وحاجات اد كده وبيقعد فى البيت يغنى ظلموه
كده كده الثقافه بتاعت الناس بش بتتغير
كده كده الناس مخهم اتلحس من كتر اللى بيشوفه
وحاجات كتيررررر اووى
موجوده وهتفضل موجوده بش هتتغير
عشان اتربنا على نظام واحد
نظام كل بنادم فى الجيل ده
بيدعى عليه
عشان ولا لاقى شغل ولا لاقى حياه لى ولا لاقى اى حاجه حلوه يتمسك بيها
اللى مزعلنى
ان الفتره اللى فاتت دى اهتميت بالاخبار
واهتميت ان انا ابقى مهتميه باللى احنا هنوصل لى
واكتشفت فى الاخر
ان هيا دايره بتلف حوالين نفسها مفيش اى شىء بيتغير
ومفيش اى جديد بيدخل جواه الدايره دى عشان هيا خلاص قفلت على كده
وبقى امر واقع كده كده بقى مفروض
حسبى الله ونعمه الوكيل
فى اللى وصل الشعب ده لكده
وحسبى الله ونعمه الوكيل
فى اللى حرق كل قلب ام على ابنها اللى مات ولحد الان بش عارفه تاخد حقها
حسبى الله ونعمه الوكيل
فكل اللى اتهنى بفلوس الشعب ده
حسبى الله ونعمه الوكيل
فكل اللى افتكر ان الدنيا ديما
الكفن ملهوش جيوب
حسبى الله ونعمه الوكيل
فكل اللى مشى يكفر فى ناس
حسبى الله ونعمه الوكيل
فكل اللى بيستغل طيبه الشعب ده

اما احنا بقى
فربنا يرحمنا
:)

فى سكه روحنا سلمنا روحنا لناس ياناس بش ناس
ضاعت حقوقنا ولما فوقنا كانت خلصت خلاص
ولما وقعوا فى بعض قولنا ده ذنب ناس بتخلصوا ناس
ده خلق بايعه وخلق ضايعه
ناس بتصبر وناس بتهوبر وناس تموت من الجوع
وناس بتصرخ بصوت ماهوش مسموع
.............

فتكم بالعافيه

فاصل صغنون
{ولا عايزه جاه ولا كتر مال بحلم بعش املاه سعد انا }

^_*

الثلاثاء، 22 مايو، 2012

الــرئيــــس


دقت ساعه الصفر
دقت ساعه العمل
الى الامام الى الامام
على رأى ميييييين ..... ايوه عليكم نور القذافى

وبقى السؤال اللى بيتسال قبل ازيك
هتنتخب مين بكره او بعدوا باذن الله!!
التليفون يرن تسمع السؤال
تنزل فى الشارع تسمع نفس السؤال
هتنتخب مين !!؟؟

وتلاقى فى ناس كلها برءاه كده
تقولك اوعى ده واوعى ده خد بالك لحسن هما بيقولوا ويقولوا
وناس تقولك
لالالالا ده هو ده راجل الدوله
وناس تقولك
لاءءء اسمعوا منى انا ده هيطبق الشريعه والاسلام وده على اساس ان احنا بنتعامل بغير الاسلام
وناس بقى تقولك
هو ده الراجل ده طيب وغلبان وابن حلال
وناس بقى تبصلك كده وتقولك
ولا ده ولا ده انتوا هتوجعوا دماغنا ليه محناش رايحين خالص
كلهم وحشين
{ يمكن زى مابيقولوا محدش عارف مين الصادق ومين الكداب بس لو بش روحنا هيجى الوحش فعلا خالص خالص يعنى فروحوا عشان تختار احسن الوحشين بدل مانتدبس فى الوحش كلوا}

المهم
كل واحد ولى راىء والمفروض كل اللى حواليه يحترم رائيوا ده اى كان الرأى
وكل انسان هيتحمل نتيجه الرأى بتاعوا
يارايت كل واحد يخليه فى نفسه ورائيه لوحدوا
وخليها فى سرك واعتبروا سر من اسرار الدوله
ونسيب باقى الناس تعيش الدور
احنا لاول مره بنختار
لاول مره سواء اللى هنختروا هيجى او بش هيجى فااحنا اللى ادنا الشخص ده صوتنا
ولاول مره يبقى الرئيس سواء ده او ده هو محتاج الشعب محتاج صوتنا عشان من غيرنا بش هيبقى رئيس

انا بقى عندى فضووووول فظيع اعرف
مين هيبقى
الرئيس

نصيحه منى واهو الواحد يعمل الخير ويرميه البحر
لما تبقى رئيس
حاطها كلمه فى ودانك كده
لولا الشعب مكنتش جيت
ماشى يعنى بش تيجى تتعمل علينا وتقولنا انا الرئيس
زى ناس بتقول انا الاغلبيه

فتكم بالعافيه