الخميس، 28 أبريل 2011

㋡ ☞


خليكى ناصحـــــه
يــا بت


яîяį



الاثنين، 25 أبريل 2011

لخبطـــه


امبارح الخاتم بتاعى ببص فى ايدى
لاقيتوا اتكسر
________

اضيقت اووى عشان اى حاجه بتاعتى بتبقى عزيزه عليا اووى

_____________

فى ناس زعلت منى الفتره اللى فاتت دى
بقيت عماله اصالح من هنا ومن هنا

________

كلمت انتمتى ولاقتها بتتضحك اوى
بقولها مالك يابنتى فى ايه
قالتلى فرحانه عشان كلمتينى
ربنا مايحرمنى منك ابدا
ومهما تبعدنا الظروف نفضل انتى نص الفوله بتاعتى وانا نص الفوله بتاعتك

_________

حاسه بتوهان احنا २०१० ولا 2011


__________

ياااااا غريبه حال الدنيا دى
فى لحظه يتقلب الحال
وتبقى مسؤوله عن اسره
اول مايكتب كتب اللكتاب ويقول العريس
وانا قابلت زوجهاا
(( انا طول عمرى بحضر كتب كتاب ونفسى اعرف هو مين المفروض يقول الجمله دى وكيل العروسه ولا العريس
هو مين المفروض اللى يقبل !!!؟؟؟))
بقت مراتوا
:डी
___________

هو انك تهتم بشخص شكلوا ايه الاهتمام ده بيبقى !!؟؟

____________

نفسى ابقى مهمه
وابقى سيده اعمال
واللبس بداله وكرافته
:प


________________

عامله ادخل المدونات واخرج وادخل تانى اجى اعلق
لاقى نفسى خرجت تانى

___________

صداع رهيب وبقيت مدمنه مسكنات

___________

امبارح ببص فى المرايا
حسيت ان انا كبرت اوى
وكل مااجى اسرح وافتكر ان لما يعدى الشهور
وتيجى السنه الجديده انا هيبقى عندى २४
بش २३
اتغم اوى واطرد التفكير من دماغى
اد ايه كان نفسى اتم २० واقف على كده
اد ايه كل مالواحد بيكبر بيشيل هم اكتر
بيحس انوا عاش كتير وان كل مابعيش اكتر بيخاف يغلط اكتر والذنوب تكتر

_________

حكايه وجعنى اوووى ووجعت قلبى اوى مع انى معرفش الولد ده بس نمت وانا قلبى موجوع
ولد كان داخل يتوضا عشان يصلى الجمعه
وقع على الارض
شالوا اخوه
واقعد يفوء فيه بش عايز يفوء
طالعوا الجيران عشان مامتوا مكنتش موجوده مهما يفوء فيه بش فى خلاص
كان عندهم امل لسه جريوا بقى على المستشفى
عرفوا انوا
كان مات
الولد ده صغير فى اعدادى
الله يرحموا
________________

اد ايه لما يموت شخص كبير بش بيقى زعلك ووجع قلبك زى مايموت عيل صغير
مع انى كلنا هنموت
وبش هيغلى على الللى خلقوا
ربنا يرحم كل اموات المسلمين

_______________

اد ايه الحرمان شىء صعب
بالذات لما تكون انسانه محرومه من الاطفال
بيبقى حاجه صعب جدااا لما تبقى فى مكان وتشوف الاطفال بيلعبوا حولها
وهيا محرومه من الشىء ده
وده عما اعتقد اصعب شىء اى انسانه تتحرم منوا
بس فى حاجه كمان
ان اد ايه ربنا لى حكمه فى حاجه زى دى
ممكن يديها بس طفل والحمد لله معاق او فى اى شىء
بجد حاجه اصعب واصعب
بش عشان هو مريض لاء
عشان مفيش ام قلبها يستحمل وجع ابنها وهيا بش عارفه تعملوا حاجه
الحمد لله على كل شىء

_______________

اخر حاجه بقى
انا عارفه ان لو قولت فى ناس هتغلطنى
بس انا هقول وهبرر
كل سنه وانتم طيبين
ودى عشان الربيع
عشان اى شىء
ماهيا كل سنه وانتم طيبين بتتقال فى كل وقت
والناس بقت بتقولها بعد كلمه ازيك من غير اى مناسبه
ام بقى الاكل بتاع بكره اللى هو بقى النهارده
فاهيا اكله موجوده طول السنه
يعنى بش يوم معين
ام حرام وحلال فديه خارج النقاش او بش اقدر احلل انا واحرم انا
انا فى جمله بقولها ومعرفش اى يعنى غلط ولا بش غلط
((ربنا رب قلوب ))
ده اللى اقدر اقولوا
وكل سنه والدنيا كلها بخير وكل شهر واسبوع ويوم حتى ودقيقه والناس طيبين وبخير دايما

الأحد، 17 أبريل 2011

انا مبحبهوش


حبه هوا
طيب حبه ميه
طيب اى حاجه
يلهوووووووووووووى
هفطس ياناس
________

اكتر حاجه بتغير مزاجى وبتعكننوا
هو الصيف ده
ويقولوا ايه
ده ربيع
فين الربيع ده ابو جو بديع
ايوه احنا اضحك علينا
الربيع طلع صيف
____________

الحاجه الوحيده اللى بتربطنى فى الفصل ده
هو المصيف
غير كده
انا مبحبهوش

____________

مفيش عمار بينى وبين الصيف
اول مايبدء يهل علينا
بجس بالاكتئاب والكسل الفظيع
وتعكير المزاج

__________

تيجى تشم هواه تحس انوا مخنوق
حتى هواه صناعى هوا التكيف
اللى انا مكنتش بقبلوا فى الاول بس غصب عنى هموت من الحر
فقريه تقولوا ايه بقى

_______________

انا فى الصيف
قابله للعصبيه والنرفزه والخناق
والبعد عن الناس
وبش بسال فى حد
وكسلانه
ومكتئبه بجد
وقريبــــــــــــــــــــــــــــــــــــــــــــــــــــــــــــــــا
قابله للانقراض :P
كل ده بسبب الفصل اللى انا مبحبهوش
الصيــــــــــــف

_______________

كل ده ويقولوا احنا فى الربيع
هيفرسونى
فينك ياسعاد
:(


الأربعاء، 13 أبريل 2011

Notes 23-3-2011 ))))^_^(((( 16-6-2010






انا تعبت بجد نفسي اتقطع خلاص
:(

خايفة ضعيفة يعنى انا هعمل اية
حاجة مخيفة دة اللى بحس بية
حاجة فيا من زمان عمرى مابحس بأمان
عمرى ما اتحققلى حلم حلمت بية
اة انا عايزة قلبى يعيش وحيد
حابه انى افضل من بعيد
بش عايزة اعيش مع ناس بتخدع بعضها
لوحدى فى حضنى احسن مستحيل فى حد

يحضن عمرى ما امشى فى سكة لية منورة

عمرى ما خدت حاجة بحبها
حتى الفرحة خايفة منها
خايفة تطلع بش حقيقة و اندفع و اعمل جريئة
و اتوجع ما انا قلبى اة بش قدها

:(:(:(


_________
ده كلام تانى
******
الرغى بتاع البوست اللى عدى ده فى حروف كتير واقعه منى عشان كنت بكتب ومندمجه فى الرغى
وفكرت ادخل اعدلوا
بس حاجه عدت خلاص بش هعدل فيها

_______________

))))^_^((((







الثلاثاء، 12 أبريل 2011

دهــ هــو أنــــا :D


ايوه صحصوا كده عشان الموضوع كبير اوى اوى يعنى

واحد سحلب على حسب الزبون ليكم كلكم بلاش طمع لكل اللى بيدخل هنا:P

وازيكم يالى احنا جاينا عندكم

بما ان الواحد بيفضل سهران لحد مالعين تتوسل ليا وتقولى قومى نامى بقى ارحمينى فقولت اجى ارغى شويه

مع انى النهارده اليوم كان طويل اوى ومليان حاجات اد كده

وبش كده بس لاء كلوا كان مشاكل

بش انا لاء انا بش بعمل مشاكل انا غلبانه اوى

دول اصحابى كلهم قفلت معهم النهارده يقعوا فى مشاكل

لدرجه بقيت اخلص هنا الاقى هنا مشكله

وجيت فى الاخر بقى بعد مالحمد لله الدنيا اتصلحت شربت ازازه بيبسى ايه كانت متلجه عشان افوء انا بقى كده

عشان كده قولت اعزمكم عليها على انها كانت موجوده

وكانت فعل ماضى

عشان كده اللى هيقعد يسمعنى هيسمعنى لوجه الله كده من غير ايتها حاجه

ناخد خط ونبدء

اه بالمناسبه اسم البوست ده

مسروق

من فيلم

اسموا ((الفار الطباخ)))

فيلم بجد جميل جدااا اتفرجوا عليه

انا


من صغرى وانا طفله غريبه كده مكنش سهل فهمى ولا انا كنت فاهمه نفسى والحمد لله يعنى

كنت رغم هدوئى ((والله ماكنت رغايه معرفش ايه اللى جرا )) بس كنت بعمل حاجات جهنميه

انا لفت على مدارس كتير والحمد للله امسكوا الخشب يعنى

مكنتش بقعد فى مدرسه غير لما اجيب اجلها كانت يتقع يتولع اه والله

معرفش كان فى حد فقرى معايا ملازمنى طول سكه الدراسه لحد الان بش عارفه مين بصراحه (((بصراحه اوووى يعنى هههههههههه))

كنت هدخل مدرسه ازهريه كمان عشان مكنتش حصلت الاعداديه

لان انا عما اسمع انها اصعب مدارس فى الدراسه مع انى نفسى لما يبقى عندى عيال وده فى المستقبل البعيد باذن الله ادخلهم ازهرى تقولوا ليه اقولكم انا ام مفتريه بقى

لاء هقول عشان عما اعتقد ان مبقش فى مدارس عدله فى ازهرى هيستفدوا حاجه انهم هيطلعوا حافظين القران

نرجع ليا انا

دخلت مدرسه حكومه

مالها الحكومه بنت ناس

وفضلت اتنقل من مدرسه لمدرسه

وشوفت عذاب مابعدوا عذاب بالذات لما كنت فى مدرسه المنيره اللى فى سعد زغلول اللى ولعت وعملها سعاد محمد عزت

كنت بتعذب فى المترو وانا بقى عيله صغنونه كده بش باينه من الارض

المهم عشان بش اطول عليكم

كنت من انا سفلوته صغنتوته كده كان عندى حلم

انا كنت بحب الرسم اوووى ولحد الان ودى هوايتى المفضله اللى بحمد ربنا ان ادنا هوايه عشان فى ناس كتير تيجى تقولهم ايه اكتر حاجه بتحبوها بيسكوتوا وبش بيلاقوا حاجه انا بقى كنت بفرح اوى عشان انا بلاقى هوايه عندى اقولها

وهيا بقى الرسم

انا كنت بحلم ان انا اطلع برسم

وده كان حلم صغنون لطفله كل سنها انها فى حضانه بش فاهمه

غير انها بتحب الرسم

وكبرت على كده وكانت ولا وراثه ولا تعليم فى حببنى في الرسم

لاء انا طالعه كده لوحدى ومحدش علمنى

انا لاقيت نفسى بمسك القلم وبرسم

واول رسمتين لحد الان محتفظها بيهم

هيا شارع محمد على

(((ودى عشان كنت كل يوم تقريبا يجوبها فى التليفزيون ))

بس هو مكنش شارع محمد على لان انا لحد ماكبرت مكنتش اعرف ان الشارع ده بتاع هشك بشك

كنت فاكره انو عشان بيجى فى التلفزيون انوا شارع راقى عقل صغنون بقى

المهم وتانى رسمه اتنين بغبان على جذع شجره

هبقى اصورلكم ده واحطوا

المهم

كبرت وحلمى يكبر ودخلت اعدادى

اتعلمت بقى الرغى وكنت فظيعه فى الرغى

ومبقتش هاديه دى خالص

وخلصت اعدادى بمجموع كويس جدااااا يدخلنى ثانوى عام وانا حاطه رجل على رجل ان انا كنت شاطره جداااا فى اعدادى

واللى الاسف مشوفتش شاطرتى بعد كده تانى هههههههههههههههه

قاعدوا فى البيت يقولولى لاء

بش تتدخلى ثانوى عام

ادخلى اى حاجه تانى

وانا صممت ان انا ادخل عام

وللاسف عشان سبب يمكن يكون سبب ملهوش معنى بس انا كنت حاطه كده فى دماغى

ان لو دخلت حاجه غير عام هيبقى ملهاش لازمه سنين الدراسه اللى عددت

وان العام احسن فى الواجها يعنى ههههههههههههه ومكنتش اعرف

وعملت اللى فى دماغى

وبقيت اقولهم ياانا ياهيا

وهطلع منها يعنى هطلع منها هو انا يعنى هقضى فيها بقيت عمرى مااكيد هطلع منها

وعددت سنه اولى على خير

وجيت تانيه

ها هتتدخلى علمى ولا ادبى

لااااااااااااااااااااااااااااااااااااااااااااااااااااااااااا

علمى طبعا

ده انا اموت ولا ادخل ادبى ده تاريخ بش هزار

يابنتى بش هتقدرى على علمى

لااااااااااااااااااا هقدر ايه يعنى

وهدخل علم رياضه كمان

انا بعشق الرياضه

الله يمسك بقى ياماستر محمود هو سبب فى دخولى علمى ورياضه كمان ده انا عبقريه

(((ده مدرسى فى اعدادى وخلنى اعشق حاجه اسمها رياضه وعلى فكره انا لحد الان بعتز بالراجل ده اوووى لانوا علمنى حاجات كتير ولحد الان بروح المدرسه عشان اسلم عليه واخد رائيوا فى حاجات كتير )))

ودخلت علمى رياضه انا وانتمتى بيبو (((هبه)))

وامشى بقى فيه وراينى هتعملى ايه

مكدبش عليكم انا دخلت الثانويه من هنا وكل امراض الدنيا جتلى

ضغط وكان فى موضوع الحساسيه ده بس ده بعيد عنكم غلطه دكاتره اقعد اتعالج من ساعه ماتولد لحد ماخلصت ثانوى من حساسيه واخد فى ادويه وهيا بش عندى اصلا

ربنا يزدهم علم هههههههههههههههههههه دكاتره صحيحى

وجالى الضغط اه والله

وكان معرفش تقريبا الدراسه فيها كان فيها منوم ولا ايه

كنت اول ماربنا يكرمنى وامسك كتاب يدخلوا يلاقونى نايمه على الكتاب

وياسبحان الله القلم لسه فى ايدى ماسكه ومحطوط السن بتاعوا على اخر حرف

مكنش بيتهز

بش بقولك كنت عبقريه

وقولت مبهدهاش

الواحد بش لاحق يخلص حاجه

انا اخبط لنفسى كام دعوه

ونجرب

وفعلا فى كلتا الليالى :p

كنا عاملين حمله نظافه فى بتنا

وواقفه زى الشطوره ست بيت شاطره ياناس

بنفض الشباك وتقريبا يعنى انا فى ساوى الشباك يعنى لو كده بس هلاقى نفسى بره

وعامله انفض واطلع غلى من الثانويه فى الشباك

وادعى واقول يارب خدنى عندك قبل الامتحانات لحسن ده انا هتفضح بعبقريتى دى

ومتقولش الشباك من كتر غلى قال طيب ونبى مانا حرمك من حاجه وبسند ايدى ولاقيت الشباك

هب هيتفح

وفى اقل من الفتفوته الثانيه كنت راميت نفسى على ورا قبل ماترمى على تحت

وكانت هتبقى بسيطه خالص

احنا ساكنين فى الدور الرابع بسيطه خالص اهو

ومن ساعتها حرمت ادعى على نفسى

تولع الثانويه هو العمر بيجى بالسهل

احنا هندخل الامتحان ولا يهمنا طالعين طالعين باذن الله

ودخلت ومقلكوش بقى اللى اكلتوا بط بط طلع عليا وز وز

طبعا مجموع مقلكوش الجميل ده :p

ولاقتهم كلهم بيبصلوا فى البيت

قوتلهم ايه فى ايه

هطلع منها هطلع ده عشان كنت علمى بس لكن ماهحاول ادبى هجيب مجموع زى الفل

ادبى والتاريخ اللى كنتى بتقولى ده بش هزار

مالوا التاريخ حبيبى فى حد يكره يدرس تاريخ بلدوا

وفعلا بش كدبت خبر انا والبت هبه بيبو انتمتى معايا لازم تبقى انتمتى

غيرنا وبقينا ادبى

وشوفوا بقى عمرى ماشوفت حد بيعند مع نفسوا زى

انا بكره التاريخ اذاكروا ازاى

مينفعش خلاص سيبك منوا يابت ياريرى هتحرقى اعصابك على ايه

طالعه منها طالعه

وكان بقى ساعتها وقت الحلم بتاعى فاكرينوا

اللى بش فاكر عقابا لى عشان يركز بعد كده يقرا من الاول :p

ههههههههههههههههههههههههههه

خلاص المسامح كريم هقولكم بس ركزوا بقى

هو الرسم

كان فى قدرات لازم اخدها وفعلا راحت سجلت فيها هواه مع انى كده نص الحلم طار ان ادخل فنون تتطبيقه ودى كانت اعلى حاجه فى حلمى

بس بدءت اتنازل واول ماشوفت الثانويه وامنت انها بش لاى حد

وقولت ادخل فنون جميله

وفعلا مشيت فى موضوع القدرات

وفضلت رايحه جايه بالاسكتش بتاعى

اروح هما يناموا اطلعها واشغل الموسيقى فى وادانى واقعد ارسم

وكنت برسم الدور بقى ال يعنى زى المهندسين لما بيصمموا حاجه

ودخلت الامتحان فيها ونجحت

واخد فلسفه

وقولت بس انا كل مذاكرتى تبقى فلسفه واهو نبقى عملنا حاجه برضو

وحبيت الفلسفه جداااااااااااااااااااااااااا ولحد الان بحبها ومحتفظه بالاجنده بتاعت الدرس لحد الان وفاكرها

وشوفوا طلعت بنت ناس على اد ماداتها ادتنى

وجبت الدرجه النهائيه فيها

وجاه موعدى مع التاريخ

اللى من غير مبالغه وربنا مافتحت الكتاب بتاعها

حتى الدرس قولت مانا بش واخده

اصلى انا مبحبش حد يعاندنى

ان بكرهك ياتاريخ يخلنى اذاكرك لاء

وعلى راى المثل

اللى بش تحتاج النهارده لوشوا بكره تحتاج لاقفاه

وبالفعل (((جامده اللغه العربيه اللى بدخلها فى نص الكلام دى ))

دخلت وخرجت من الامتحان ولا اكنى دخلت اصلا

واللى يفرس ان انا عارفه انا هسقط فيها

وكانت اخر ماده

بس على مين ده انا خارجه من الثانويه لازم اهوى على نفسى

خرجت واتفسحت بعد الامتحان مع العيال صحابى وبقيت اضحك واقولهم انا عندى احساس ان انا لسه بش خلصت

وبما انا عندى الحاسه السادسه

فعلا مكنتش خلصت

ان انا شليت التاريخ

هههههههههههههههههههههههههههههههههههههههه

واحتجت لاقفاه وقتها

وقعد غصب عنى اذاكروا

زى اللى بتشرب دوا مر

واتقرصت قرصه جامده اوى من التاريخ لان عمرى ماسقط

ولا كنت اتخيل ان انا اسقط

وقولت زى ماعندت مع التاريخ وبش ذاكرتوا

هاعاند مع نفسى وهحفظوا وهصموا كده

وفعلا والله العظيم حفظتوا وبقيت بحفظ بارقام الاشكال وبالصفحات

وربنا مايورى حد انك تروح تمتحن دور تانى دى ياااااااااا

كانت على قلبى زى الحاجه الرخمه

احنا اصلا بنمتحن فى مكان تانى الدور التانى ده غير مدرستى

انا كنت فى جيهان السادات

كنت بمتحن فى مدرسه بقى جامبها

وكنت حاسه ان الناس كلها بتبصلى وعارفين كنت والله مكسوفه من نفسى جدااا ولا اكنى عملت عماله

ودخلت اللجنه ولا قيت العيال الموجوده بش هممها الامتحان زى

بقيت مستغربه اول مره اشوف بقى دور تانى

بس وجت ورقه الامتحان وفضلت نص ساعه مخاصمه الورقه والله وبش عايزه ابصلها

معرفش ليه كنت قاعده متنحه للناس والعيال اللى موجودين فى اللجنه

فين لما فوءت وبصيت فى الورقه

وبقيت اقرا واحل اقرا واحل

كده من غير كتابه كل ده قرايه

لحد ماخلصت كل الاسئله ولاقتنى عارفهم كلهم

رجعت سابت الورقه تانى وفضلت اعيط

هبل بعيد عنكم عارفه وبعيط

بس اكتشفت ان انا كنت بعيط عشان كنت مضغوطه اوووى وبش مصدقه ان انا هخرج ومن اللجنه دى وانا بقول للثانويه باباى

وفعلا حليت كل الاسئله ومفيش سؤال سابتوا كده

وفضلت فاكره التاريخ والحفظ بتاعوا لحد فتره طويله

وامى حبيبتى بقى هيا اللى ليها الفضل

ورححت امتحنت بعد كده فى الكليات

عشان حلمى اللى كلوا ضاع تقريبا

عشان التاريخ كده هاخد نص الدرجه مع انى لو اخدوا بالدرجه كان زمانى بقى زى الفلسفه

راحت تربيه فنيه وتربيه نوعيه فنيه ونجحت فيهم

وزى مايكون ربنا بش كاتبلى ان انا ادخل برضو حاجه من دول

ويوم كتبت الرغبات قوتلهم محدش يسالنى انا عايزه ايه

لان مكنش فى حاجه اصلا الواحد يختارها

هههههههههههههههههههههههه

((بتضحكى ))

راح اول معهد جاه فى السكه بتاع حاسب الى واربع سنين

اتكتب

وسبحان الله

جاه

هههههههههههههههههههههههههه

وهو معهد العباسيه

اللى هو بلا فخر

بيقولوا عليه عبده باشا

انا بقى بعد ماجاه قولت افرح والحمد لله واكيد ربنا كتبلى كل الخير واهو حاسب واربع سنين وتمام

وببص لاقيهم بيقولوا ده عبده باشا

مقلكوش انا سمعت من هنا وبقت عفاريت الدنيا تنتطط قدامى انا معرفش انوا بتاع باشا ده

ولا عمرى شوفتوا

بس الاسم عصبنى معرفش ليه

وفعلا طلع المعهد يعصب يعصب يعنى

الحاسه السادسه بقى

وقولت يالا الحمد لله برضو خليكى قنوعه واستحملى انتى اللى عملتى كده فى نفسك

وراحت اول مره عشان اقدم ورقى انا وبابا بالعربيه فااحنا جايين من قدام كليه هندسه عين شمس

انا معرفهاش

(((انا فى اماكن كتير واقعه منى معرفش عنها اى حاجه ولا اكنى بش عايشه هنا اصلا ))

اول ماشوفتها بقيت فرحانه اوووى واقول لنفسى شوفت يابت ياريرى عشان اقتنعتى اهو المعهد جميل اهو ازاى

هههههههههههههههههههههه مكنتش اعرف اللى فيها بقى

وببص الناحيه التانيه لاقيت اسم المعهد

بش هقولكم حصلى ايه بس لاقيت نفسى بقول حلو حلو

زى اللى بيقنع نفسوا كده

وبدءت واخدها جد اول سنه مذاكره بقى

انا لسه طالعه ماقرصه التاريخ

اه قبل ماانسى اقولكم حلمى وصل لايه الاسكتش بتاعى بقى من ضمن الشنطه اللى فيها كل حاجاتى من وانا كنت فى حضانه لحد يوما هذا

بقى ذاكره يعنى

نكمل المعهد

وودخلت الامتحان واكتشفت ان المواد اللى كان بيطلع عينى فيها بجيب تقدير اقل من المواد اللى يوم امتحانها بفضل نايمه

اصلى انا مقولتكلوش انا كنت اروح المعهد

وارجع اكل وانام بدرى عشان تانى يوم هروح المعهد

اللى بقى مكنتش بذاكر كنت بجيب تقدير فيه اكبر

اول سنه جبت جيد مرتفع

تانى سنه شلت مادتين

بس جبت جيد :p

وشلت لان كنت بقى ملتهاش جايبه همها يعنى اللى اذاكر اجيب اقل قولت خلاص بش اذاكر خالص واجيب تقدير

غير انا كنت بقى اخد على المعهد وبقينا اصحاب انا وهو

انا والمعهد

:p

واتعلمت حاجات كتير وشوفت الوان ناس كتير

عمرى ماشوفتهم

كنت عارفه ان الدنيا بابا وماما واخواتى واهلى واصحابى بتوع المدرسه

معرفش ناس غيرهم وكنت فاكره ان الناس كلهم زيهم

بس اكتشفت ان فى انواع كتير

شوفت وغصب عنى اتعملت واتعلمت

كنت زى الطفله كده اللى لسه بتتعلم المشى

بتفضل تقع تقع لحد ماتعرف تمشى

وفعلا فضلت كده وكل مااتعلم اقول انا اتعلمت

الاقى حاجه تانيه واتعلم تانى

واتظلمت وربنا جبلى حقى

وكونت ذاكره جميله جدااا لحد الان بحب اروح امشى فيها

وهيا ذاكره اماكن

محطه منشيه صدر والمشى اللى كنت بمشيه انا والبت مروه صحبتى دى

والطريق من جامعه عين شمس لحد المعهد

ونجف ده اهم حاجه هناك عندى

والراجل بتاع البيبسى ابو كشك صغنون

واتخرجت وبتقدير جيد (((عايزه شغل بقى :p )))

وبعد مااتخرجت قولت اكيد ربنا خلنى فى المكان ده عشان اشوف الناس دى اللى في منهم حبتهم اوى وفى خلونى اكره التعامل مع الناس

وخلصت

لاقتنى واقفه بقى مفيش اى شغل

راحت اماكن واخرها المدرسه الخاصه بس بش كملت اسبوع على بعضوا

بس حبيت ارجع لحلمى مكانوا تانى بس على حاجه تانيه

واخدت 3d max

واهو بشغل وقتى

يمكن

ولحد الان عاطله اه والله


ولسه لحد الان مقتنعه الحمد لله بكل اللى عديت عليه

وكل اللى بشوفوا وكل اللى مكتبولى عند ربنا

ولحد هنا استوب

نكمل فى وقت لاحق

تيت تيت تيت

أمضاء:

انـــــــــــــا

يالا باباى عليكم

يالا منك له لها من هنا


يلهوووووى على الرغى البتاع كلوا هياخد البتاعه كلها