تاج وبفصوص كمان :P

مساء الفل عليكم
مساء ايه بس ياريرى
انا دماغى ساحت شكلها
هبقى احكى بالتفصيل الممل اللى حصل بس بش دلوقتى
عشان انا بش راغيه خالص خالص مالص
شوف ونبى وانا بقالى يومين مشغوله فى التفكير اكتب ايه اكتب ايه جالى الجنان كله اللى اكتبوا
بس بش دلوقتى برضو :p
دلوقتى ايه بقى ياولاد ياحلويين جالى تاج
بحلم بيه انا من اول ماعملت المدونه
جالى من منمن العسل
اردهلك فى فرحك ياقمر واجبلك انا البوكيه بقى :p :D
يالا انا هرد بقى
ده التاج ياجدعان




1:

انت مين بقى ؟
انا ريرى
ريم
واللى كتير بش يعرفوا ريهام

_________________

2:

عندك كام سنة

22 سنه للاسف :(

__________________

3:

هل انت متزوج ؟

لاء عانس لسه :D

___________________

4:

دراستك ايه

كنت وكان ياماكان
نظم معلومات
حاسب الى يعنى

_______________________

5:

كم طولك وما لون بشرتك

طولى تقريبا كده شبرين ونص ههههههههه
اللون فحلقى ههههههههههههههه
طبعا بهزر
عادى يعنى ياجماعه زى بقيت الناس ليا طول وليا لون بشره
بش هريحكم برضو :P

______________________

6:

هل تمارس عملا بشهادتك او عمل حر وما هو

اها طبعا بمارس:D
بش بحب انا الكدابين خالللللص:P
((كلمه فى سركم انا عاطله عاطله عاطله :( ))

______________________

7&8:

ماذا تفعل بوقت فراغك*

*هل لديك هوايات وهل تمارسها

بش لاقيه وقت فراغ عشان على طول انا فى فراغ
لاء نكلم جد بقى شويتين تلاته
انا تقريبا على طول قاعده على النت حتى لو بتفرج على
TV بحب الرسم بس الله يرحموا بقى
وقت المزاج بقى بحب اكتب على الموبيل
وبحب ازاز لب

_______________________

9:

هل تشعر برضا ربنا عنك
ابقى كدبه لو قولت طول الوقت بحس بكده
بس اوقات كتير بحس ان ربنا بيحبنى وراضى عنى وببقى مبسوطه اوووووووى حتى لو بحس كده فى لحظات

__________________________

10:

عندما تكون فى موقف اتخاذ القرار..تخالف الجماعه.. ام تشرك معك الاخرين

انا طول الوقت خلف خلاف
باخد راى الناس وفى الاخر بعمل اللى فى دماغى
بتعب الناس معايا فى التفكير وفى الاخر بعمل اللى انا عايزه
متعبه انا

__________________________

11:

ماهو الشىء الذى فعلته وندمت عليه طول عمرك

شوفوا انا كتير بقول ياااا ياسلام يارايت كان حصل كده
بس عمرى ماشعرت بالندم اللى هو بقى ندم واقعد شايله الهم
وعلى طول بقول اكيد ربنا نقذنى من حاجه انا بش اعرفها
وفعلا بيجى بعدها واكتشف ان الحمد لله ربنا انقذنى من نصيبه كنت هقع فيها

_______________________

12:

هل تصارح غيرك بالحقيقة ام تقول له ما يحب سماعه

اه وشا كده بش عندى انا تفاهم ههههههههههه
اه بقول الحقيقه حتى لو هتاذينى
بش بعرف بدلق زى الجردل كده
بس يعنى بعمل حساب ان مجرحش حد بكلمى
بحاول على اد مااقدر

_________________________

13:

متى يقسو قلبك

فى سرى
هقولك يعنى لما اقعد مع نفسى كده فى سرى ااقول انا لازم ااقسى بقى ومعملش ومكلمش وابقى شريره اوووى فى سرى ههههههههههههههه
واول ماافوء من سرى برجع تانى زى ماكنت
اختصارا يعنى بش بعرف
وللاسف

______________________

14:

من هو اول من قلت له احبك
امى واخواتى والواد وزه وانا وانت ودقى يامزيكا ههههههههههههههههه
((الواد وزه ده للدماغ تروح بعيد ابن اختى ))
لاء انا هقول بجد
ده اول تاج برضو وانا كنت بحلم يجيلى تاج هجاوب بصراحه
لو قصدك على كده كده
انا مقولتش لسه صفحه بيضه
بس حبيت يعنى عشان عارفه واحد هيطلع يقولى انتى كدابه
بس مقولتش احبك دى
عشان دى بجامرك
بتتطلع مره واحده بس ههههههههههههه

____________________

15:

هل يمكن ان تحب احد من المدونين
ممكن وليه لاء
هما بش ناس برضو
اوعدكم يوم كتب الكتاب هبقى اسالوا انت من احد المدونين ولا لاء وهقولك ههههههههههههههه :P

______________________________

16:

ماذا تعنى لك المرأة والرجل
كل واحد فيهم مكامل للتانى
بش راغيه خالص اهوا اجابه مختصره اهو

___________________

17:

فى زمن البحث عن المادة ماذا تبحث انت

على الضحكه اللى من القلب
على راحه البال
على حاجات كتير
الانسان بش بتخلص احلاموا

____________________

18:

متى تعرف انك تحب

لما قلبى يدق ولما اقع على بوزى ههههههههههه
لاء بجد هقول
.........
بش عارفه بس لما احب بجد هقولكم وهنرغى رغى للصبح

__________________________

19:

الشخصية التى اثرت بحياتك
ناس كتير كل حد بيعدى عليا فى حياتى بيسيب اثر

_________________________

20:

هل يوجد من تراه سعيدا فى الدنيا ولماذا
معتقدتش عشان محدش بيعجبه حالوا
ودى عايزه رغى كتيررررر بس بش دلوقتى

__________________

21:

ماهى درجة صراحتك
مليون الميه
عشان اللى فى قلبى على لسانى
وسبحان الله بش بعرف اوقف لسانى ده خالص

_________________________________

22:

ماهى المواقف التى يمكن ان تكذب فيها
لما اكون عايزه اخبى عن حاجه جوايا :P هههههههههههههه
لاء بجد مفيش مواقف معينه بس اكيد بنكدب وبنعك الدنيا بعد كده

________

23:

هل يتغير الحب بعد الزواج
اه
اقول ليه ونبى وبش هرغى تانى:D
هو اكيد بيبقى موجود بس بيقل بيبقى فى مسؤليات كتير الحال بيتغير

_____________________

24:

فيما تفكر الان

االاتنين الكيبورد
والبتاع هيفضل سليم ولا هيرجع يركبوا عفريت تانى

___________________

25:

لو لم تعش بمدينتك ..فأى مدينة تفضل ان تعيش بها

لو بلد باريس
لو جزيره او مدينه صغيره تبقى فى وسط النيل

___________________________

26:

من اول من يأتى ببالك لتحكى له اسرارك

ياانا
ياهبه ((انتمتى))
يامروه ((صحبتى ))

_________________________

27:

من هو الد اعدائك

لو الناس انا الحمد لله مليش اعداء مع حد فى حد عدو ليا انا بقى هو حر
لو الحاجات
اول حاجه بكره اووووووى الظلم وان حد يظلمنى
مبحبش حد يعندنى انا اعاند بس افترى بقى تقولوا ايه
مبحبش اللى يقولنى حاجه انا بش قولتها او بش عملتها
بقفل ااوووى من اللى ياخد منى حاجه انا بش ادتهلوا ببمزاجى
مبحبش الشمس فى الصيف
مبحبش اللف والدوران وكلمه الحوارات
مبحبش الغرور واللى واخد مقلب فى نفسه ويعيش عليا
مبحبش الغموض
مبحبش الباميه ولا محشى الكرنب
ههههههههههههههه
انا عايشه ليه اصلا
نكمل مبحبش بعد كده :P

___________________________

28:

من هو صديقك

غير اصحابى
النيل

___________________________

29:

ماذا تكره فى الحياة

اظنى انا لو اتكلمت فى السؤال ده الناس هتحرم تتدخل هنا
بس استنوا افتكرت حاجه هههههههههههه
لا لا خلاص بش هرغى

__________________________

30:

ماذا تحب

بحب
بحب الاطفال
بحب النيل والبحر
بحب صوت الكروان
بحب الفل الصغير
بحب العسليه
بحب الدوم والحرنكش
بحب اروح الملاهى عشان اصوت
بحب الواد وزه
بحب اكون فى المود بتاعى واقعد ارغى وانسى الهموم واقعد
كل الناس اللى بحبهم
بحب اكل كبده اسكندرنى من عند نجف
بحب اقف قدام المرايا واكلم نفسى (((مجنونه )))
بحب حاجات كتير كفايه كده

_________________________

31:

كيف تواجه ما يضايقك وكيف تتصرف فى المفاجأت

الطناش ياسيدى على الطناش
انا لما بقفل من حد خلاص دماغى بتتربس بالقفل
لكن لو مضيقه عادى عادى برضو ببص وبسكت وبقول حسبى الله ونعمه الوكيييييييييل
وانا منى للسما على طول يعنى محدش يفكر يضيقنى :P
بحب المفاجات بس الحلوه يعنى
بش يجى حد يفاجنى بمفاجاه تجيب اجلى وشعرى يشيب فيها

________________

البتاع خلص :(
كان نفسى يبقى فى اكتر عشان ارغى اكتر عشان بش راغيت كتير انا
ههههههههههه
بس انتظرونى فى رغى اددددددددددد كده بس لما يتعدل حال النت والدنيا البايظه دى
_____________

شكر خاص لمنمن العسل على التاج الجميل ده

^_^ Some Dreams ^_^

خلاص اسامه منير قرب يخلص وانا بش عايزه انام مع انى دماغى هتنفجر من الصداع
عارفه هتقولوا وانتى بتسمعى اسامه بتاع بش عارفه ايه اه بسمعه
ان فى كلام كتير بيقولوا بيعجبنى
المهم انا مكنتش داخله اكتب على اسامه
انا وحاطه الموبيل فى ودانى وبسمع والدنيا ضلمه حواليا ومفيش غيرى اقعد افكر فى
حبه احلام
^_^
عارفين انا نفسى فى ايه
انا همسك حاجه حاجه
اول حاجه
_____________
نفسى اسافر
بس بش اى مكان لاء
نفسى اروح باريس
معرفش ليه بس طول عمرى ماحد كان يسالنى نفسك تسافرى فين
كنت بقولهم نفسى اروح باريس
فى حب غريب ليها معرفش ليه
_______________

نفسى يبقى عندى كروان
غريب الحلم ده عشان صعب
بس بجد انا بحب اوى الكروان
مع انى عمرى ماشوفتوا ومجربتش ان انا اكتب فى جوجل صوره لى
وبش عايزه اشوف شكلوا ايه
عشان انا نفسى يبقى عندى بش عشان شكلوا لاء
عشان بحب صوتوا اوووووى
وعلى طول بربط صوتوا بحاجه حلوه
وبجد والله حتى لو كنت زعلانه ومضيقه
اول مابسمع صوتوا ببتسم اوووى
معرفش تفسيرى لحب صوتوا صح ولا لاء
بس انا لما بسمعوا بحس ان الدنيا كلها بتتضحك ولسه فى حاجه حلوه

________________

نفسى يبقى عندى مركب فى النيل
يمكن انا اول مره كنت اقعد فتره فى وسط البحر على باخره كنت مستغربه اووووى وخايفه جدااا
عشان كنت ببص حواليا بش شايفه غير السما ولزقه فى البحر
بس انا بعشق النيل والبحر
وبعتبر النيل ده صديقى الكتوم
ممكن اكون مجنونه
بس انا فعلا اول مابروح قداموا بسلم عليه ولا اكنى بنادم هيحس بيا
وبقعد اتكلم معه وبيبقى اكتر حد انا صادقه وانا برغى معه
وبشهدوا على كل اللى بيحصلى
عشان على طول كنت بحس ان انا برمى همى فى مكان قادر انوا يستحمل وانوا هيفضل شيل اسرارى
حتى البحر بعتبر الموجه اللى فيه انها بتيجى تاخد اسرارى وبتحدفها اخر البحر

______________

نفسى يبقى عندى مزرعه كبيررررررررررررره
وكلها فل
مزروعه كلها فل واقعد زى زمان ااقطفوا
بحب ورده الفل اووووووى الصغيره دى

_____________

نفسى يبقى عندى ملجأ
مليان اطفال كتيررررررر وابقى انا اللى مسؤوله عنهم
بس بش اى اطفال
الاطفال اللى بيقولوا عليهم الطفل ده لقيط
مع انى مبحبش الاسم ده
بس نفسى بجد ابقى مسؤوله عن الاطفال دى
عشان على طول بحس انهم دول اكتر حد مظلوم
يمكن الايتام اتظلموا مره واحده لما بقوا من غير اب وام
لكن اللقيط اتظلم مرتين مره من الاب والام ومره من الناس هو ملهوش اى ذنب انوا بقى طفل كده
يمكن حلم غريب بس يمكن نفسى فيه عشان انا بجد بعشق الاطفال وفى نفس الوقت بيصعب عليا الاطفال دى

_____________

نفسى يبقى عندى مرسم
يمكن ده اكتر حاجه مرتبطه باكبر حلم انا حلمته والحلم الوحيد اللى فى حياتى والحلم الوحيد اللى كنت كل مااكبر كنت بتعلق بيه اكتر واحبوا اكتر وافرح اوووى ان انا ليا حلم يمكن ضاع منى بس لسه بحبه

______________

نفسى الاقى انسان منى
غريبه عارفه بس انا نفسى فى كده بجد
نفسى الاقى انسان يستحملنى ويبقى عارفنى اووووى وحافظنى اووووى وقبل ده كله يكون بيحبنى اووووى واكتر منى
نفسى يكون عارف ايه اللى جوايا من غير مااتكلم
ويعرف ان انا الحب عندى افعال اكتر
ويعرف ان كلمه بحبك دى
صعبه جدااااا ان انا اقولها
عشان بخاف ايوه بخاف
عشان نفسى اقولها مره واحده لانسان واحد
((عارفه هتقولوا يعنى انتى محبيتش حد لاء حبيت ولو قولت غير كده ابقى كدابه
انا اعجبت وحبيت زى اى انسان بس مقولتش بحبك وبش هقولها غير لانسان واحد وبش هقولها غير لما اتاكد انوا هو ده اللى هيفضل معايا ...... وسمعتها من ناس بس مكنتش برد عليها وكنت ولا اكنى سمعتها )))
ويطمنى ان انا لما اقولها هو هيقدرها اوووى وهتبقى اول واخر واحد ااقولوا الكلمه دى
نفسى فى انسان طيب اجرى عليه وقت مااكون عايزه حد يطبطب عليا ويقولى معلش
نفسى فى انسان ارمى عليه كل حمولى واحس ان وانا معه مطمنه بش خايفه من حاجه
يتحمل مسؤوليتى يشلنى جوه قلبه
يبقى منى
عارفه بش هلاقى كده بس بش همل اكيد هو موجود

______________

نفسى يبقى عندى ولد وبنوته
يبقى عندى ولد يكبر واشوفوا وهو بيكبر قدامى ويبقى راجل وفى نفس الوقت يفضل الطفل الصغير الجزء منى الحاجه الصغيره اللى انا كبرتها
ويبقى عندى بنوته اللى ادلعها وتبقى الحاجه الحلوه اللى فى حياتى الطفله اللى انا وهيا حاجه واحده

_____________

نفسى افضل اسمع الدعوه
ربنا يحبب فيكى خلقه
نفسى يفضل حضن امى موجود
ونفسى افضل اللعب واهزر مع اخواتى وانسى ان انا اكبر منهم
نفسى افضل اتشقى مع وزه ابن اختى وابقى طفله زيوا زى لانى بجد اكتر وقت انا بضحك فيه وبنسى اى حد لما بيكون مازن معايا

______________

نفسى يفضل الناس اللى بحبهم موجودين حواليا
حتى الناس اللى مشيت من حياتى نفسى يرجعوا اوى حتى بظلمهم وقسوتهم ليا ورغم طردتهم من حياتهم وحياتى
بش عايزه حد يبعد
نفسى الدنيا كلها تبقى موجود حواليا
حتى اللى موتوا واللى بحبهم اووووى نفسى يرجعوا تانى عشان بجد وحشونى اوووووووووى
انا ببقى اضعف مخلوقه على وجه الارض لما حد يكون قريب منى ويبقى بش موجود بعد كده فى حياتى
بش عايزه ابقى كده

____________

نفسى افضل مع اصحابى هما بش كتير بس بحبهم ويقعدوا يحكى ليا كل اللى عندهم حتى لو هموم
يشغلونى بمشاكلهم واقعد افكر ويتحرق دمى واتعصب عشانهم
ونقول لبعض كل الوحش اللى بنقع فيه واللى بنعملوا من غير مصالح عشان نغيروا

___________

نفسى اصحى الصبح زى زمان وانا بضحك وبش شايله هم حاجه
نفسى اخد نفس طووووووووووووووووووووووووووووووووووويل
***** وقبل ده كله بس قولت هقولها فى الاخر
ان ربنا يرضى عنى ويفضل راضى عنى *******

!!!!!!!!!!!!!

تفتكروا كتير عليا الاحلام دى
عارفه ان فيها صعب يتحقق
بس انا نفسى
عارفين انا اول مره اقعد كده واكتب انا نفسى فايه بجد
اول مره احس ان انا عايشه عشان نفسى فى حاجه تتحقق او تحصل
ممكن بش تحصل ولا تتحقق
ويمكن احلام كتير وقعت منى واحلام عاشت معايا ومشيت وسبتنى
بس كفايه عليا ان انا حلمت بيها

&&&&&&

تصبحوا على خير بقى ربنا يستر بش احلم بعد الاحلام دى كلها بكابوس
:D

اه بما انا جعانه
عارفين نفسى اكل ايه
دوم عرفينوا وحرنكش وعسليه من غير سمسم والحلاوه الشعر البيضه دى ((انا مالى قلبتها طفاسه كده ليه ))
بالذات الدوم بعشقوا وانا باكلوا وبسمع اغنيه بتاعت زمان اووووى بتاعت جدو ياجدو يااحسن جد
يااااااااااااااااااا واتشعلق على رجل جدو الله يرحموا
نفسى يفضل فيا الطفوله اللى انا بحبها
واروح زى مابروح دلوقتى للمدرسين بتوعى وانا صغيره
ويقوليلى ياااااا ياريرى انتى لسه طفله
بفرح اوووى
عشان لسه الناس شايفين فيا ريرى الطفله الشقيه
بش اللى كبرت وبقى عندها 22 سنه واللى كل مااكلم انتمتى تكبرنى اكتر وتقولى احنا بقى عندنا سنه23
بتعصب بجد هههههههههههههههههه

انا تقريبا قوتلكم تصبحوا على خير ههههههههههههههههه
يلهووووووووى على الرغى
باباى عليكم

ياعبيطــــــه ديه مجاملـــــــه

بش عارفه عايزه ابدء الكلام بحاجه غريبه بس بش عارفه
بس وانا جايا وماشيه فى الشارع كنت عماله افكر
انا لما ارجع هكتب ايه
انا هرغى فى حتت المجامله دى بس بعد شويه
______________________

اليوم كان عجيب حتى الناس اللى شوفتها كنت ماشيه حاسه ان انا بشوف الناس والشوارع والاماكن بطريقه تانيه بش عارفه ليه
سيبكم من وانا فى نص الطريق خلينا اول ماوصلت ميدان العباسيه
بقيت ماشيه بسال الناس عن مركز التعبئه والاحصا والمشكله ان اى حد اسالوه يوصفلى نفس الوصف بس انا امشى خطوه وارجع اسال تانى
بقيت ماشيه والله عقلى بش معايا وحاسه ان انا فى حاجه من جوايا قلق الله واعلم بش عارفه
بس انا ماشيه وبش عارفه نهايه الطريق ايه وهوصل ولا لاء بش عارفه
وكل ماوصل عند حد عشان اساله اقف قداموا ثوانى كده ساكته وبعدين اسال زى مايكون عايزه ارجع تانى بش عارفه
المهم وصلت
دخلت بقيت رايحه جايا رايحه جايا والرجل يرغى
كان راغىىىىىى اووووووووووى بصراحه
والموبيل يرن ارد وارجع ادخل وفضلت كده لحد مالقيت نفسى خد بعضى وراحت خارجه وسايبه الراجل عمال يرغى مع نفسه و خلاص هيسجل اسمى
تقولوا جنان تقولوا هبل بش عارفه
خرجت بقى بقيت واقفه بش عارفه انا همشى ازاى وبش عارفه الاتوبيسات رايحه ولا راجعه بش فاهمه حاجه
راحت ماسكه الموبيل واقعد ارغى رغى فظيع لحد مالقيت صوت تخليص الرصيد خلاص
معرفش ليه انا اتكلمت وانا فى نيتى اخلص الرصيد كل ده وانا ماشيه وبكلم وبش عارفه اصلا اذا كنت ماشيه صح ولا غلط
بس بقى اللى مطمنى ان بتوع المرور اللى سالتهم على المكان وانا راجعه بقوا عملين يسالونى وصلتى ولا لاء وارد وانا برضو ماسكه الموبيل وعماله ارغى ومندمجه فى الرغى وان انا اخلص الرصيد
وبش فى دماغى الاتوبيسات ولا اى حاجه ماشيه لدرجه ان انا كنت بعدى الشوارع من غير ماابص فى عربيه جايا ولا لاء وكذا مره اخلى عربيه تفرمل على اخر لحظه
لحد ماوصلت ميدان العباسيه تانى والرصيد فنش خلاص وواقفت فى نص
ابص قدامى جامعه عين شمس اهى
رواحت حاطه سماعات الموبيل فى ودانى وشغلت اغانى باعلى صوت فى الموبيل وحطيط ايدى فى جيبى وانطلقت على طريق جامعه عين شمس
اولا المكان ده ليا ذاكره كبيرررررره اوووى عندى ذاكره اتكونت فى 4 سنين فى عشره بيبنى وبين الطريق ده
يمكن كان ابعد طريق ليا فى مروحى وانا مروحه بتنا ولما كنت لسه بدرس فى المعهد بس بعشق المشى هناك
ومشيت بقيت ببص للمكان بنظره غريبه اوووى
اده ده بتاع الورد اللى كنت اول مره اشترى ورد كان منه من سنتين كده
اده ده كان فى راجل هنا بيقعد يرسم كنت بقف كتير ايام زمان اتفرج على الرسم بتعوا وكانت بستغربلوا اااوى بس زعلت اوووى عشان مكنش موجود
والناحيه التانيه كليه السن ياااااااااااااااااا ايام اولى معهد من 5 سنين اده كل السنين دى عددت كده والناس اللى كانوا هنا
كنت ماشيه عماله ابص بطريقه كنت حاسه الناس اللى ماشيه بيقولوا مالها دى
كنت ماشيه رايقه اووووووى ودماغى شغاله مع الماضى وبس واى كان الموقف اضحك اوووى من جوه نفسى واقول والله كبرتى ياريرى
وبقى المكان مجرد ذاكره عندك عدت عليكى يجى 5 سنين جريوا كده منك
ولا ايام ماكنت اقعد اغلس على مروه صحبتى ونقعد نودود كده مع بعضيتنا
حتى الاغانى اللى شغاله فى وادنى كانت مع الايام دى مع الذاكره دى
بش عارفه ليه دماغى كانت كده النهارده بس يمكن عشان كنت بقالى كتير مروحتش من طريق الجامعه ومحطه منشيه
والمحطه اللى لما اكون راكبه المترو وبعدى من ناحيتها ببقى مبسوطه اوووى حتى الكراسى وكرسى معين لى هو كمان ذاكره وعشره معايا
واكتشفت حاجه بجد

ان الاماكن بتصون العشره اكتر من البنادمين

معرفش ازاى بس كفايه ان وانا ماشيه وببص على كل مكان هناك لى موقف وعشره وذاكره معايا كنت بضحك اووى من جوايا
كفايه كده رغى على المكان وعلى اللى حصل المهم بس ان انا كنت راجعه مبسوطه اوووووى
معرفش ليه مع انى وانا رايحه كنت حاسه ان انا شايله هم يمكن المكان اللى مشيت فيه هو اللى فرحنى بش عارفه
ورغم ان كنت حاسه بالفشل بس كنت مبسوطه
يظهر كده اتجننت ولا ممكن الشمس اثرت على دماغى
من ضمن الحاجات اللى افتكرتها قدام جامعه عين شمس وكنت بضحك اوووى وعامله اخبى الابتسامه لناس تقول عليا مجنونه

______________________________________

شوزفرينيا Schizophrenia

ايوه انا عندى البتاع فى البتاع
انا عندى شوزفرينا
لما تبقى فى لحظه عقلك بيتوه منك وتعمل حاجه وانت بش واعى ليها
وبعد ماتعملها تنام وتصحى ولا اكنك عملت حاجه
والحاجه اللى عملتها عدت كده من غير ماتحس انك بتعملها

&&&&& ^_^ &&&&&&

ايام ثانوى لما العيال صحابى منهم كانوا بياخدوا علم نفس
وكانه بنقعد فى الفسحه نرغى كانوا تمالى يقعدوا يدروسوا شخصيتى
وفى الاخر تتطلع واحده فيهم تقولى انتى ياريرى عندك شوزفرينا
انا عندى البتاع ده


^^^^^^^^^^^


مبحبش ابان مغلوبه ضعيفه وصورتى فى نظر الناس تتهز
ولا حد يشوفنى يقول ماسكينه يعينى عليها ملهاش حظ
وبضحك واكنى الضحكه بجد
بش محتاجه طبطبه من حد
ماانا لو بنكسر من جوايا
بش عايزه فى نظر الناس اتهز
مبحبش حد يشوف اى دموع فى عنيا
عششان ولا اصعب عليه ولا اصعب على حد

&&&&& ^_^ &&&&&&

انا لما ابقه خايفه وببقى ضعيفه واحس ان انا مكسوره ومجروحه
بقعد فى الاوضه لوحدى وبقفل اى نور يدخلى
وبقعد فى سريرى واقعد فى ركن جواه خالص واحضن مخدتى
وبقعد ساكته خالص
ويقعد عقلى يلففنى على كل حاجه مرت عليا
وبعد مااحمل نفسى اى حاجه حصلت وبتحصل واقعد اجيب كل الهم على دماغى
وبلاقى ان كلوا حاجه ضلمه حواليا
بنام واصحى اضحك واهزر ولا اكنى البنادمه اللى كانت صاحيه قبل ماتنام
غيرى انا

^^^^^^^^^^^




الصوره دى بحب ابص فى عينها اوووووى
بعيدا بقى على انها طفله وانا بموت فى حاجه اسمها اطفال
بس بصوا كده فى عنيها
تحس انها بتقول
لـــــــــــيه
هه ليـــــــه
ليه بقى وحط مليون سؤال جامب ليه
انا كنت ناويه اعمل بوست لوحدوا على الصوره دى
بس انا فين وفين لما ببقى عايزه اكتب
عارفين انا اكتر سؤال بكرهه فى حياتى ان حد يجى ويسالنى ليه على اى حاجه
عشان مبقاش عارفه الاجابه وكمان انا اكتر حاجه بضيقنى ان اسال حد ليه وبش يرد عليا
من كام يوم
اتصلت بيا انتمتى وقالتلى ده فى شغل وحكتلى الشغل فين وايه وخلاص
اوكى انا موافقه مع ده بش فى دماغى بس حاجه تشغلنى وخلاص دلوقتى
وهيا خلاص هتتصل بالبنت اللى جايبه الشغل هيا عارفنى وخلاص الدنيا هتضبط تمام وخلاص
ببص لقيتها بتتصل بيا
قالتلى بصى ياريرى هيا بتقولى انتى بش هتعرفى تشتغلى هنا
طيب ليه ايه فى ايه
ال ايه انتى على نيتك وبش هتعرفى تاخدى حقك من الناس دى عشان دول عايزين حد يسلك معهم
بش فاهمه يعنى ايه
يعنى ابقى شريره يعنى
طيب اهو انا شريره اهوا
والله ماعارفه ليه
بس انا يعنى ممكن ابقى شريره اهوا نيهاااااااااااا
!!!!!


((اعصابك ياريرى اعصابك ))

المهم
صوره البنت دى بحس انها كلها عتاب
اهو انا بقى عندى نفس النظره
لكل حاجه
عندى عتاب لحاجات كتير ولناس اكتر
بس للاسف بش قادره اتكلم ببص وبس
_________________________________

اخر حاجه بقى هقولها وكفايه رغى اكتر من كده

ان انا لا ولا والف لا
ان انا ابقى حد تانى غيرى
عندى شوزفرينا عندى بتنجان
هفضل ريرى
حتى بالحاجات اللى انا بش بحبها فى نفسى
عشان انا بحس ان انا كده لى طعم معين
لو حاجه اتغيرت هيبقى مليش ولا طعم ولا لون
وكفايه عليا ان حتى لو واحده او اتنين او اى عدد فى الدنيا دى كلها فاهمين ريرى وعرفنها وبيحبوها كده بعيوبها
بش مهم الباقى بش مهم اى حاجه
المهم ان انا من جوايا صافيه لاى حد حتى لو حد بيتمنلى الشر
المهم ان انا بش بشيل من اى حد ولا بزعل من اى حد
المهم ان انا لما بكون عايزه حاجه بقولها من غير اى قيود حتى لو القيود دى نفسى نفسها
وساعت على اد مانا كتير فى اوقات بقول ايه اللى انا بعملوا ده بس كفايه ان انا برتاح ان انا قولت حاجه انا حاسه بيها بش مهم بقى مين هيقدر ومين هيسمع ومين هيقول عليا ايه
انا كده




ااقولكم ايه بقى سلام انا كفايه رغى كده

الحاجات المكعبله

على راى ورده وحشتونى وحشتونى
على اد مالست دى جزائريه بس انا بحب اغانى كتير ليها اووى وكنت بسمعها وانا صغيره وحافظه اغنيها
المهم
_______________



انا والله كويسه
الكلمه دى بقت بقولها فى اليوم اكتر من مليون مره بش عارفه فى ايه
لو حد اتصل بيا ممكن تبقى نص المكالمه يعنى انتى كويسه
فى ايه ياجماعه مانا بغنى اهوا وبلعب وبضحك وعادى خالص ده انا حتى صوتى لما بكلم فى التليفون بغيروا بيبقى بينطق بالفرحه كده
انا كويسه والله كويسه دراعى لسه مكانوا ورجلى لسه مكانها :p ااقول ايه بس
قلبى اهوا لسه شغال لسه بش موت شغااااال ينفرستى هههههههههههههههههههههه ((ناسف على القطع الاعلانى ده ))

انا الحمد لله كويسه وعمرى ماهكون حاجه غير كده عشان انا الحمد لله عشان مقتنعه الحمد لله
وبش معنى ان انا قولت انا زعلانه ولا حتى بان عليا الزعل يبقى كده خلاص هموت لاء
عشان اى حد معرض انوا يزعل ويضيق وبش بقى تقولوا مفيش حاجه تستاهل
بس حلوه كوبايه الكاكاو دى اوووى


_____________________

فى حاجه كمان عايزه اعلق عليها
انا بكره الغرور وبش بحب اشوف حد قدامى مغرور بتعصب بجد
وتبقى سوده بقى كمان لو انا اللى خليت اللى قدامى يتغر يعنى ببقى انا السبب كمان


______________________

نرجع سريعا بقى لشعار انا من كام يوم قولتوا على الفيس توك بتاعى
جالى جووووووووووواب جالى جوووووووووواب من القوى العامله لولولولولىىىىىىىىىى

انا كنت ناويه اعملوا بوست لواحدوا واسميه يوم مع الحكومه بس لاقيت انها بش تستهل ((قصدى طبعا الجواب بش الحكومه وانتوا اكيد فاهمين اكتر منى ))
فى ناس قالتلى اده ياريرى انا بقالى سنين بش سمعت القوى العامله دى ههههههههههههههههه عشان تعرفوا بس
ان ريرى بش اى حد القوى العامله نامت نامت وصحيت على العباده بالله اللى هيا انا وياراتهم ماكانوا صحيوا
بش هطول عليكم وعشان بش احرمكم من حاجه انا صورت الجواب اهوا


لاء وايه مليان طوابع مكلفين نفسهم اه والله
بصوا انا بش هعلق عشان لو علقت بش هنام فى بتنا
بس انا هقول حاجه واحده بس
***ياخساره 15 سنه راحوا بلاش يابخت فعلا اللى اخدها من اصلها واترزع فى البيت ***
شويه بكش ::
هما عملوا اللى عليهم كتر الف خيرهم بش عارفه بصراحه يعنى اعمل ايه لو بايدى اعملهم تمثل بدل رمسيس
((عارفه نفسكم تعرفوا حصل ايه ااقولكم قداموا هناك وانت تعرفوا وتشوفوا بعينكم عشان تبقوا بش حرمتوا عنيكم من حاجه ))
حسبى الله ونعم الوكيل


انا خلصت كلامى خلاص

بش تنسوا تقدموا ورقكم بقى للقوى العامله هههههههههههههههههههههههههههه

زهــــقت رغـــى .....

والله ماعارفه انا هكتب ايه
بس انا بقالى كام يوم بكتب على الموبيل عشان مخاصمه النت ويمكن كمان الدنيا كلها
يمكن بدخل اشغل اغانى واقعد العب وانا بش مركزه
والعجيبه ان انا بخسر وبزعل
وافضل مصممه انا انا لازم اكسب مع انى بش مركزه
وعمرى ماصممت بشكل ده ان انا لازم اكسب
يمكن عشان نفسى مره فى حياتى اكسب حاجه
فقولت اعوضها فى اللعبه
بس برضو بواصل لمراحله وبفضل ااقع واخسر
قولت اخرج اشم هوا
مسافه ماخرجت قولت انا عايزه اروح
مبقتش عارفه انا عايزه ايه
ولا عارفه ايه اللى حصل
ولا اكنى الزمن وقف لحظه فقد كل الوعى
ولما جاه الزمن يرجع تانى
لقيت نفسى متلخبطه وبش عارفه انا وقفت لحد فين
ااقولكم انا هروح وهبقى ارجع تانى عشان حتى لما جيت اكتب وبعد ماكتبت السطرين دول استخسرت امسحهم وكسلت اكمل
عشان بصراحه
مبقاش ليا نفسى ارغى
عشان زهقت من الرغى بقالى سنين برغى نفسى مره ابعد كده فى مكان بعيد اووووووووووى وافضل ساكته اتفرج من سكات نفسى اعمل زى البنت اللى فى الصوره فوق دى
عارفين انا صعبان عليا نفسى اوووى ((ماهيا نفسى غير انا ))

انا هسكت وهبعد واسبها تمشى زى ماهو مكتوب
واتفرج من بعيد



*****
انا قولت بش هرغى بس مخنوقه

__________________

****البتاع ده ((من فاتوا قديموا بيمر عليه تانى ))

بش عايزه اصعب على حد

‎‎

http://helm-riri.blogspot.com/2009/11/blog-post_13.html

HAPPY VALENTINE"S DAY

HAPPY VALENTINE"S DAY


الكل يدهن نفسوا احمر بش تنسوا بقى

بجد فى سؤال من ايام زمان بش زمان اوووى يعنى انا لسه صغنونه برضو

ايه علاقه اللون الاحمر باليوم ده
ليه بش يبقى اخضر ولا فلحقى :p

المهم انا عملت بالوصيه ودهنت الكلام بااحمر عشان بش اخلى نفسى فى حاجه برضو
وبالصدفه ولا بلاش :d

البتاع اللى تحت ده محدش لى دعوه بيا ده لتفريج بس



وكل حب يارب والناس كللها احباب

مفيش كـــلام ....

...........

مجرد احساس

لما تحس ان الدنيا كلها فى سكه وانت فى سكه
بتحس ان السكه طويله اوووى
وان فى حد خناقك
وبتبقى بش عارف تاخد نفسك
وعينك بتفضل تبص هنا وهناك
وبتقول يارب حد يحس بيك
________________________

لما بروح ااقف عند النيل بقعد اتكلم معه
كنت على طول اروح هناك وشايله جوه منى حزن اد كده
ااقولوا شوفت يانيل
والاقى عينى بتشكيلوا
وقلبى بيدق جامد
والهوا مخلى ايدى زى التلج
وعنيا تملى بدموع

__________________________


ايه اللى يطمنى بعد كده
........

___________________


(((صبرنى يارب )))

هتتحب ياعباس يعنى هتتحب

ازيكم عاملين ايه
كويسين انا عارفه اكيد يعنى
انا بقالى كتير بش بكتب او بدخل وبخرج زى مابدخل
بس فى حاجه النهارده استفزتنى موووت
مع انى مليش ولا فى الكور ولا فى البطيخ
بس وانا بشوف الاعلام اللى موجوده لقيت ايه



اه علم جزائرى
اه وحيات ربنا
اه والنعمه
انا معرفش دمى اتحرق ليه
بس دمى اتحرق وخلاص
وبش هعلق
عشان بش عارفه ااقول ايه فى مواقف زى ديه
سبنكم بقى من اعلام الدول والدول
عشان مليش انا فى حرقه الاعصاب دى خلينا فرفش فرش
بس قولت نبدء اول بوست فى السنه الجديده بحاجه تحرق الاعصاب :p
عشان نبقى مميزين
نحنوا نختلف عن الاخرون برضو


ناخد خط كبير كده
________________________



ده دبدبتى
احلى هديه ومن اغلى وارق واحب وحاجات حلوه كتير كده
والشنطه بقى اوعى وشك
انا اول ماشوفت الشنطه قولت انا هحطها فى التنجيد بتاعى
وهحطها ديكور فى الشقه
امخاخ بقى تقولوا ايه
انا عايزه كمان ااقول ان فى حاجات كتير فرحتنى اوووى يوم عيد ميلادى
وعملت عيد ميلاد بجد احلى عيد ميلاد ممكن يكون كان فعلا متاخر اسبوع
وممكن كمان كنت فى البيت بس بجد كنت بغنى هابى بيرث داى بكل قوتى وباعلى صوت
مع انى بقى عندى 22 سنه بس يالا نخليها علينا

ناخد خط كمان كبير
______________________________





هتتحب ياعباس يعنى هتتحب

هيا بتتقال غير كده بس يالا برضو خليها علينا
انا بش عارفه هنفضل نخلى كل حاجه علينا لحد امتى
من شويه كنت بسمع اغنيه فؤش او فؤاد
الراجل ده بجد تغيب تغيب وتحن لصوتوا تانى

((شايف نفسك على ايه تاعب قلبي معاك ليه
ايه متغير في هواك ومحير قلبي معاك
يرحم أيام لما كنت بتيجي بكملة
وعاملي فيها الغلبان فاضل ايه تاني كمان
شكلك كده مستهون بيا وبش فارقة معاك الحنيه
وعايز تاني تجيب رجليا وترجع تاني تعذب فيا
أطلع من راسي وانساني يا هقلب لك عــ الوش التاني
ياهاخليك لما تشوفني وتلف تشوفلك شارع تاني
جالك قلب وليك عين ونسيت بتكلم مين
مين قالك اني بخاف يلا اللي ماشافش اهو شاف
اللي ما بينا ولسه حسك عينك تنسي
وتقول على اللى انت عليه
طيب شوف انا هعمل ايه )))

اه ونعمه حاجه غريبه
بش عارفه
بصوا انا بش هحدد مين ولد ولا بنت انا هتكلم على الاتنين
الواحد فيهم لما يلاقى اللى قداموا بيموت فيه كده وبيحبوا
بيتنفخ النفخه التمام ويعمل فيها بقى الواد ولا البت اللى مجاش ولا قبلها ولا بعدها
وتلاقيهم زى الطاوس كده بس للاسف ريشهم بيتقصص فى ثوانى
عشان المشكله ان فى الاخر بيبقوا هما الاتنين ميتين على بعض
انا بس بقول حاجه
والنبى بطلوا بقى تشوفوا نفسكم اوووى كده
على راىء فؤاد
وبش تنسوا انكم قبل ماتتنفخوا والنفخه السوده دى كنتوا عاملين زى البجعه اللى مكسور قلبها
((انا معرفش بيبقى شكلها ايه بس هيا جت معايا كده ))
ولما بقى يحب التانى يادى الاونى درس
يلهوووووى
يبقى بعد ماكان منفوخ وماشى نفش ريشوا
بيبقى عامل زى الفرخه الدايخه
وبيتمنى كده يرجعلوا تانى
بش تنسوا انتوا بتكلموا مين
الحقوا نفسكم بقى بدل ماتكونوا بش حصلتوا فرخه عند اللى نفشين رشكم عليهم

ناخد خط بقى كبير اوووووى
_________________________________________

ملحوظه نونو

اللغه اللى فوق دى انا بش مسؤوله عنها ولا ليها اى صله بيا
لا بجد انا بش عارفه انا بكتب والكلام اللى بكتبوا ملهوش معنى غريب كده
بس ده من تاثير
بش هقول من تاثير ايه
انا حره
بمزاجى
:p

________________

انا كمان فى حاجه هعملها
من ضمن برضو اانا حره وبمزاجى وكده
انا هقفل التعليقات ((كدابه يناير :p)))
عشان
ابقى شايفه نفسى انا كمان
هههههههههههههههههههههههههههه
ولا فاهمين حاجه ولا انا
_______________
بس ستوب لحد كده

وبش نجلكم فى حاجه وحشه ابداااااا :p

وقرفتنى ياعباس قرفتنى :d

كل سنه وانتى طيبه ياريمتى

ال ايه خير الله مااجعله خير
وفى ذات الليله ومع طلوع الفجر
جاءتوا من حيثوا لا اعلم ههههههههههه
سيبنكم((حلوه سيبنكم دى فى قاموسى يعنى سبكم )) من الكابوس والاحلام الا فوق دى وتعالوا نحتفل


1\1\2010


كل سنه وانتى طيبه ياريمتى والسنه اللى جايا .....هتبقى زى السنه الا عدت هههههههههههههه



انا تميت ومع عقارب الساعه 12 يوم 31\12 بليل يعنى 1\1



تميت




((تعبت عمال لما لقيت سنى ههههههههههه)))


ياللللللللهوى بقوا 22 سنه وفاضل 8 سنين واتم 30 حدش ياخد سنتين بلاش سنه
اه يانى يازعلى
ولا عجزتى ياريرى
مكنش العشم فيك ياعمرى تجرى منى كده
اهىء اهىء اهىء
((انا ااجل العياط فى البوست اللى جاى نكد نكد)))
يالا نولع التورته

________________________________


شويه ملاحيظ


***فى يوم 1\1 برضو ياجماعه انا فتحت الصفحه دى يعنى كده
حلمى كبر وبقى
عندوا سنه





****وان يوم 1\1 يوم راس السنه واول يوم فى سنه جديده


ه

كل سنه يارب والناس كلها طيبه وبخير وتبقى سنه جديده كلها سعاده لينا كلنا



حاجه نونو بقى


معلش اخر حاجه استحملنى ده عيد ميلادى بقى
ياجماعه يارايت كلنا الساعه 12 يوم راس السنه كلنا نصلى وندعى ربنا
عشان فى الوقت ده بتحصل حاجات كتير بتغضب ربنا
ونبقى احنا بدءنا السنه الجديده بحاجه حلوه وبتقرب من ربنا


وهابى نيو يييييييير


والسلام عليكم
بباى

shut up your mouth

فى حاجات كتير بش بينفع نقولها
فى حاجات بتبقى خلاص هتتطلع مننا ونرجع تانى نسكت
عشان صعب ان احنا نقولها
عشان خايفين نقولها قبل ماتفرحنا تجرحنا
وعشان انا خايفه
هفضل ااقول لنفسى هوووس
اسكتى خالص بش تكلمى
فى ناس بتقول
((ساعات كتير السكوت بيبقى الرد الوحيد))
بس عمروا ماكان الحل
تفتكروا ايه الحل
نقول على كل الا جوانا حتى لو ممكن يهينا
ولا نسكت ونقول زى مالناس بتقول السكوت الرد الوحيد
بس انا بش عايزه الرد انا عايزه الحل
اكلم ولا اسكت
!!!!!

____________

متلخبطين صح وانا كمان متلخبطه اكتر منكم
يالا سلام

أأأنــــا مــــــللانــــه ^_^

هو ليه احنا نبقى شايلين للناس معينه فى حياتنا حاجات حلوه كتير
واول مايزعلوا مننا نبقى هنموت كده ونصالحهم
ويفضلوا يدلعوا علينا واحنا نستحمل دلعهم علينا
ويوم مااحنا نزعل بش نلاقى اى حاجه منهم
حتى العتاب بيستخسروا فينا
حتى الحنيه منهم بنبقى واقفين ومستنين منهم حتى لو كلمه تجبر بخاطرنا

*** ليه ديما احنا الا بنشحت الحب من الا احنا بنحبهم ***

________________________

يمكن اول مره فى حياتى اعمل بحاجه اتعلمتها ومكنتش مقتنعه بيها
اتعامل بكل قسوه حتى مع نفسى
________________________

بفرح اوووى لما بقدر على نفسى وااقول لاء المره دى لازم اتغير
بس عنيا ديما بتقلب فرحتى لحزنى واقعد اعيط ولا اكنى اتهزمت __________________________


حتى الفرحه بقت عباره عن كدبه او تمثليه بمثلها على نفسى واحاول اقنع بيها الا حواليا

________________________

ليه انا ضعيفه اووووى كده !!!!!

نفسى ابقى راجــــــــــل ((ريرى اتجننت))

ياالف مسا على الناس الكويسه
امبارح اقعد افكر افكر وااقول ايه يابت ياريرى كفايه حزن بقى هيا الناس ناقصه
تمشى فى الشوارع تلاقى الناس سرحانه
تركب المترو تلاقى الناس وشوشها بقى الحزن مغطى على ملامحها
طب انا ونبى مره ركبت المترو وفضلت ابص فى فى وشوش الناس من كتر ماانا سرحت وانا عامله افكر ياترى كل واحد ايه الحزن الا جواه الا يخلي وشوا رسم 118 دول نسيت المحطه وفى الاخر برضو موصلتش لحاجه
وعلى راى المثل
ايوه يختى قولى قولى ال بيقولوا فى الامثال ((اللى يشوف بلاوى الناس تهون عليه بلاوته )) وكل بلاوه بقى على اد صحبها
يالا بقى اهى بلاوى وبتترمى على الواحد
يختى ماتيجى نفرش ونقعد نربع فى الارض مالك يابت قلبتها ست ستوته كده ليه

__________________________________________

نرجع بقى لموضوعنا الا انا لحد دلوقتى بش عارفه اكتب ايه فيه اصلا
بس بدام المدونه كلها احلامى فتعالوا ااقولكم على حلم غريب شويه لاء شويتين لا لا لا تلاثه شويات هههههههه
ريرى نفسها
تبقــــــــــــــــــــــــــــى راجـــــــــــــــــــــــــــــــــــل



اه والنعمه نفسى ابقى ولد بس ده بش عشان بش عاجبنى ان انا ابقى بنت لاء بالعكس
انا اول حاجه طبعا مقتنعه ان ربنا خلنى بنت وكويس ان مكنتش ولد
تانى حاجه البنت دى كائن انا بحس انوا بسكوته ماشيه على الارض (((طبعا طبعا )))
نرجع بقى للحلم الغريب ده ان انا ابقى ولد وبدام انا معجبه اوووى بالبنت ليه عايزه ابقى ولد
هقولكم بس قبل مااقول الكلام الا هقولوا بش يخص الشباب كلهم جزء منهم وكمان محدش يزعل من الا انا هقولوا
وانتوا لو شايفين كلامى غلط صلحوه

___________________

نبدء من قبل مايتولد الولد
تلاقى كل الناس عايزين البطيخه قصدى بطن الام يبقى فيها ولد
من اول الجوز(( الا هو مستقبلا يعنى هيبقى الاب )) لحد الحماه واخوات الجوز واخوات الجوزه (( الا هيا هتبقى مستقبلا يعنى الام ))
ويجى النبى حرسوا الولد
ييبدء بقى كل الا حواليه يقولوا انت راجل يعنى
سى سيد
كلمتك مسمعوه حتى لو غلط بالجزمه تمشيها
انت الا فى ايدك زمام اى موضوع
انت توافق وانت الا ترفض
انت وانت وانت ويفضلوا يعيشوا الواد وينفخوا فيه بقى لحد مايفرقع من كتر الغرور
________________________

يكبر الواد
ويعينى بقى لو لي اخوات بنات
يقعد الواد ويفضل قومى يابت اعملى كذا
ولو البت يعين امها اتكلمت يفتح الجعوره وطبعا فى الاخر بيتعملوا كل الا هو عايزوا ماهو الولد
الخروج يدخل ويخرج زى ماهو عايز من غير انت رايح فين وانت جاى منين واييييييييييه بيخرجوا لحد بليل ((ياعينى علينا :( من الساعه 9 نكون فى البيت ))
الحب هو الا يحب وهو الا يسيب واحده واحده بقى عشان انا متغاظه بالذات فى الحته دى
الواد يلاقى البت يعجب بيها يحبها يروح يقولها
لكن البنت بقى تفضل سنين عمرها كلها وممكن تعنس كمان عشان تباين بس انها بتحب الاعمى فى عينوا الا بش بيشوف ده
لاء واييييييييييييييه ممكن فى الاخر بعد مايقولها بحبك ماهيا اصلى الكلمه دى بقت سهله اووى يكون ناوى يتسلى بس ماهيا شويه لب هيتسلى بيهم
لكن البنت ياحبه عينى غلبانه عشان كده بحس ان البنات عندهم وفاء اكتر من الشباب عشان عمال لما يوصلوا للى بيحبهم بيكون يعينى طلع عنيهم
لكن الولد الموضوع كلوا عندوا سهل يحب ويسيب واحتمال كمان يجوز ويطلق عادى ماهو زى مااحنا قالولوا ايه (((انت الا فى ايدك زمام اى موضوع ))) عليكم نور

المهم يعنى انا بش قولت انا نفسى ابقى ولد عشان ابقى كده لاء
اومال عشان ايه
عشان اعدل زمام الموضوع هههههههههههههههههههههه
قصدى يعنى عشان ابقى شاب غير كل دول

هبقى ازاى بقى دى عايز شرح طوووووووووووويل
او ااقولكم اخرجوا وبصوا على الشباب
واى حاجه بش تعجبكم
انا هغيرها وبش هتبقى فيا
وهبقى
ولد تمـــــــــــــــــــام
مخلص زى مابيقولوا






محدش عندوا عروسه بقى ههههههههههههههههه

ياجماعه انا والله بنت والحمد لله ان انا بنت
نعمه هفضل اشكر ربنا عليها طول عمرى

((ربنا يستر بقى ))

لبيك اللهم لبيك لبيك لا شريك لك لبيك

لبيك اللهم لبيك لبيك لا شريك لك لبيك
إن الحمد والنعمة لك والملك لا شريك لك

وديلي سلامي يا رايح للحرم
وادعيلي وسلملي على دي الأمم

انظر للكعبة يا محلاها نور وجلال
يغشاها يحرسها ربي ويرعاها
واذكرني أمامها وادعيلي

يا ساعي ما بين الصفا والمروة
يا شارب من زمزم اتذكرني بدعوة

يا طالع على جبل الرحمة يا ماشي في وسط الزحمة
اطلب من مولاك الرحمة
واذكرني أمامها وادعيلي


___________

مرضتش يعدى يوم زى وقفه عرفات ولا زى عيد الاضحى
غير لما اجى اعيد على مدونتى
وعلى كل المدونات اللى حواليا
وعلى كل الناس
كل سنه وانتم طيبين
ويارب كل المسلمين يقفوا على جبل عرفات
وانا كمان يارب
يارب ارزقنى تانى ان انا اركع جمب الكعبه
(((بجد اروع واجمل واحلى وحاجات بش تتوصف كده وقفك بس قدام الكعبه يارب مايحرم منها حد ابدااا )))
كل سنه وانتم طيبين


اما انت ياخروف

كان بدرى عليك عليك بدرى هههههههههههههههههه

العيد فرحه ماءءءءءءء وهناكل لحمه
ماءءءءءءءءءءء

نفســـــى وأنـــــــا

ههرب تيجوا معايا
بس بش ههرب من نفسى لاء
عشان انا لاقيت نفسى ان انا غلط فى حق نفسى كتير واقعد اتكلم معها ولاقيت ان انا زعلتها كتير
ولازم اصلحها عشان هيا اولى من اى حد
بدل مااقعد اصالح نفس غير نفسى
اشوف نفسى انا هيا دلوقتى محتاجنى من اى وقت تانى
محتاجه ان انا اقعد ارتب كل حاجه من اول وجديد
محتاجه اشوف انا غلط فى ايه عشان اصلحوا
محتاجه ابقى صريحه معها اكتر من كده بش اقعد ابرر ليها اى حاجه هيا بتقولها
عشان هيا صح وانا غلط
______________________

ساعات كتير الحقيقه بتالمنا وبتوجعنا اووووى عشان كده بنقعد نخبى وندارى فيها ونبرر ونقول لا لا هيا بش كده هيا زى مانا عايزها تبقى
بس لازم نفوء لازم نجيب جرادل ميه كتيرررررررر ونرميها فوق دماغنا عشان نفوء
عشان نعرف احنا جينا ازاى وماشين ازاى عشان العمر بش بيتعاد تانى ولا بيقف لحد مااحنا نضبط نفسنا لاء
العمر بيجرى واحنا لازم نلاحقوا قبل مايخلص ونقف زى الا رقصوا على السلالم ولا الا فوق عرفيهم ولا الا تحت

___________________________

عشان كده قررت ان انا هبعد عن كل حاجه وهفضل انا ونفسى وبس لفتره
اصالح فيها نفسى عشان بش معقوله هفضل مطنشها وعامله نفسى بش واخده بالى انها زعلانه منى
وهرجع تانى بس هرجع انا ونفسى حاجه واحده وبتمنى ارجع انا وهيا نبقى صح بش هيا صح وانا غلط لاء نبقى احنا الاتنين حاجه واحده
يمكن هرجع حد تانى يمكن
بس اكيد باءذن الله احسن من الاول
وهجى وهقول على كل حاجه اتغيرت فيا
زى مابيقولوا كده هعمل ريفريش لنفسى وللانا
_________________________

هبعد فتره بش هدخل نت وموبيلى هعملوا سيلنت عشان بش اجرى عليه وارد واضعف تانى وارجع زى ماكنت واكنى كده بش عملت حاجه
بش هفكر فى حد خاااااااااالص

______________________
ادعولى ارجع زى مانا عايزه


_______________
اعتراف::::

انا بجد اول ماعملت المدونه دى مكنتش بحبها وكانت بنسبالى حاجه وخلاص اتعلمت بتتعامل ازاى
وعملتها ويوم ماعملتها كنت بتنطط وفرحانه اوووى عشان عرفت اعملها
واول تعليق جانى كان من كابتن عمرو فكرى خلنى فرحت اكتر وكنت مبسوطه اوووى
بس برضو مكنتش بحبها وساعات كنت بنسى افتحها اصلا
بس دلوقتى انا بحبها اووووى وهيا تقريبا اول صفحه بفتحها اول مابفتح
وبقعد الف على كل الناس الا عندى الا بجد اتعلقت بالمدونات بتاعتهم اوووى
حتى لو دخلت وبش رديت بس ببقى مهتميه اوووى اعرف كل جديد عند اى حد فيكم
وحبيتكم اوووى
وحبيت هنا اوووى
بش عارفه امتى يعنى ولا ليه
بس انا حبيت هنا وعندكم واتعلقت بيكم وبالمدونه بتاعتى
بس


_____

وعمال ماارجع
كل سنه وانتم طيبين ويارب على طول نبقى بخير وطيبيبن
والعيد فرحه وهناكل لحمه ههههههههههههههه
كل سنه يارب وانتم بخير وعيد سعيد عليكم وعلى كل الناس يارب

وجوووووووووووووووون

هيييييييييييييييييييييييي هيييييييييييييييييييييييييييييييييي
تيت تيت مصر تيت تيت مصر


_____________________

بعيدا بقى عن الماتش والاعصاب المشدوده فى لقطه بجد بش عارفه حد اخد بالوا منها ولا لاء
شوفتوا ياجماعه
د\ حاتم الجبلى لما نط حتت نطه على جمال مبارك وهتك يابوس واحضان
فرحتوا يعينى نستوا الخنازير ههههههههههههههههههههههههههه

_____________________

ياخسرتك ياترنك من قطعك من كتر شده اعصابى اقعد اقطع فى البتاعه

_______________________

خدوا بالكم كمان من الكوره
بجد كوره دماغها انشف من الحجر يزقوا فيها مفيش بش عايزه تتدخل ولا اكنى حد عملها عمل

_______________________

ولا شوفتوا انا بش عارفه اسامى لاعيبه الجزائر بس هو واحد مميز كده حاطط شبكه على دماغوا
فى حاجه بيضه انا طول الماتش عندى اعتقد ان ده حجاب او عمل هههههههههههههههههههه

_____________________

بس ايه جبنها او والله جبنها احنا ناس بتحب المعجزات بتحب الاثاره بش حبنا نقفل الماتش فى اول شوط ((نبرر برضو ههههههههه))
وفضلوا لاخر دقيقه شدين اعصابنا عشان يعرفونا انهم ادها وادود

____________________

كان نفسى فى الوقت ده ابقى ولد عشان انزل والشارع واقعد اهيص
بس بش حرمت نفسيتى من حاجه برضو وقلبت بتنا اسخن من الشارع

_______________________

يارب نفرح تانى ده الفرحه حتى من غير فلوس

بش عايزه اصعب على حد

!!!!!!!!!




ايوه بش عايزه حد ابقى انا صعبانه عليه
بش عايزه حتى حد يقولى معلش
بش عايزه حد يطبطب عليا وياخد بخاطرى
ايوه انا بش عايزه
بش عايزه حد يقولى ان انا غلط لما حبيت الناس
بش عايزه حد يقولى ان انا الحاجه الا انا بحبها هيا الا مضيقنى دلوقتى
بش عايزه حد يقولى ان انا خسرانه فى كل حاجه
بش عايزه حد يقولى اكره الناس الا بتحبها عشان هما بش عندهم قلب
بش عايزه حد يقولى شوفى ادى اخره الا يفضل حطط الناس طول الوقت فوق دماغهم
بش عايزه حد يقولى شوفى ادى اخره حبك ليهم
بش عايزه حد يعزينى فى حبى للناس دى
بش عايزه ابص فى المرايا عشان بش ابص فى عينى والاقى ان انا طول الوقت كنت بكدب على نفسى
بش عايزه اتكلم مع نفسى عشان انا بش قادره ارفع عينى قدامها وااقولها شوفتى
ايوه انا بش عايزه اصعب على حد
انا هقدر اعدى كل ده لوحدى من غير حد عشان طول الوقت كنت معتمده ان الا كل حواليا بس مره واحده اكتشفت ان الهوا هو الا حواليا
__________________________

طول الوقت كنت بقول ان دول استحاله استغنى عنهم استحاله ابعد عنهم
والا هيجى يقولى ابعدى عنهم هبعد عن الا هيقولى كده
حتى لو كده بخسر حياتى الا بعد كده بس استحاله اخسر حياتى الا قبل
كده طول الوقت يقولولى مسير كل واحد ينشغل فى حياتوا انشغلى فى حياتك انتى كمان كنت بقول لاء مقدرش حتى لو الدنيا شغلتهم انا عمرى ماهنشغل عنهم
بس للاسف
كلهم وقت مايحتاجوا حد يقولهم معلش او ياخد بيادهم ويخفف عنهم وقت لما يكونوا بش لاقين الحب
يرجعولى وبكل ساذجه بحبهم اكتر من كل مره
وزى الا فتحلهم قلبى وبقولهم خدوا الا انتوا عايزينوا كل الحب الا جوايا
وبس للاسف
فى الاخر بياخدوا كل الحب ويسيبوا قلبى فى كل حته فيه جرح
ويرجعلوا هما تانى يعيشوا حياتهم بش بيبصوا وراهم يشوفوا هما عملوا ايه فى قلبى
ماهما لاقوا قلوب تانيه غير قلبى انا
ويروحوا ويجوا تانى لقلبى وقلبى يدخلهم تانى جواه ويقولهم خدوا خدوا الحب كلوا ولا يهمكم
عشان انا بحبكم كلكم
بس خلاص المره الجايا لما ترجعوا بش هتلاقوا ولا حب ولا قلب ويمكن كمان لما ترجعوا تلاقونى مبقتش موجوده فى الدنيا خالص
ياترى هتندموا ولا حتى تبكوا عليا
من الا شوفتوا
معتقدتش اصلا انكم هتفتكرونى
___________________________

بس انا بش محتاجه شفاءه من حد
وبش عايزه اصعب على حد
بش قابله عزا من حد فى حبى ولا قلبى ولا حتى فيا
انا بقولكم روحوا انا بش محتاجكم
ولا محتاجه حد يكون معايا
وانا هقدر اطبطب على نفسى وهقدر امسح دموعى وهقدر اخد بخاطر قلبى وهقدر اكون انا من غير حد

_______________________

ايديكم الا بطبطب دى وكلها قسوه بش محتاجها
دموعك الا بتنزل عليا الكدبه دى بش محتاجها
كلامكم الا كلوا تزيف فى تزيف ده بش محتاجها
حتى قلبكم الا عمرى ماانشغلت اذا كنت فيها ولاء بش محتاجها
بش محتاجه اى حاجه تيجى منكم ولا تككون منكم
عشان انا تعبانه منكم وبش هقدر يكون الا بيخفف حزنى ده يكون حد منكم ___________________________________

ملحوظه :: الكلام بش مفهوم انا عارفه بس خنقنى ولو كنت ااقدر اكتب اكتر من كده كنت هكتب بس ساعت الواحد بيككون فى حاجه خناقه ومن كتر الخنقه بش قادر يطلع الا جواه

يــارب

ليه بغمى عينى على الحقيقه
يارب انا بقيت بش شايفه خلاص ولا حقيقه ولا خيال
ليه بحاول اختراع حاجات من الوهم عشان اوهم نفسى
يارب هو انا مجنونه
يارب الهمنى الصبر من عندك ليه الدنيا بتكعبلنى فى حاجات مكعبله
يارب بلاش اتصدم لحسن لو اتصدمت المره دى ممكن اموت فيها اه والله
يارب قلبى يفرح لو دقيقه بس وبش مشكله فى بقيت الدقايق الا بعد كده

شويه رغى مع نفسى

هو ليه

هو ليه اكتر سؤال انا بكره ليه واكتر سؤال بسالوا لنفسى ليه
والغريبه ان عمرىى كلوا الا عدى ده بش لاقيه اى اجابه
!!!!!!!!!!!!!!

تفتكروا

اكتر حاجه بتخلينى اسرح لما اسال نفسى وااقولها تفتكرى ..... يابت ياريرى
والغريبه برضو ان بش بعرف اخمن اى حاجه
!!!!!!!!!!!!!

احساس

احساسى اكتر حاجه بصدقها وبش بحب اكدبها
والغريبه ان مفيش اى دليل تخلينى اصدق احساسى
!!!!!!!!!!!!


احلامى

اكتر حاجه اتمنتها وعشت عشانها وبقول انا هعيش عشان بكره هيحصل كذا لو ربنا كتبلى نصيب اعيش
والغريبه ان بيجى بكره وحلامى بش بيجى ولسه عايشه برضو
!!!!!!!!!!!!

دموعى

دموعى اكتر حاجه بتالمنى ومع كل دمعه بتنزل من عنيا بحس ان روحى بتتطلع وقلبى بيوجعنى
والغريبه ان كل دموعى خلصت وبقى عندى اللامبالاه ولسه روحى موجوده بس قلبى بيبوجعنى
!!!!!!!!!



ساعات كتير بتمنى مكنش انا
لما بقعد لوحدى وافكر الاقى نفسى ان انا بش عملت اى حاجه خالص حتى ااقل حلم ممكن الانسان يتمناه بش هقول ان انا بش عرفت احققوا لاء انا خوفت احققه
بجد الخوف ده شىء فظيع بس للاسف هو بقى انا
!!!!!!!!!!!!!!



نفسى يبقى عندى الحاسه السابعه